Policia e Durrësit ka reaguar lidhur me konfliktin e ndodhur në Kepin e Rodonit ditën e sotme, ku pas përplasjeve fizike, u përdor edhe armë zjarri, por fatmirësisht pa pasoja të rënda.
Sipas uniformave blu, disa banorë të zonës janë përleshur me përfaqësues të Kishës Katolike. Këta të fundit kishin ardhur në një vend për ta rrethuar pasi kishin certifikata pronësie. Por edhe banorët kanë pretenduar se për atë pronë kishin certifikatë pronësie dhe këtu nisi sherri me sende të forta.
Disa persona janë shoqëruar në polici, ndërsa disa të tjerë kanë përfunduar në spital. Policia njofton se në vendngjarje është gjetur dhe një gëzhojë arme zjarri.
Bëhet me dije se dikush nga banorët ka qëlluar me armë në ajër.
Njoftimi i Policisë:
“Durrës/Informacion paraprak
Në zonën e Kepit të Rodonit, disa banorë të fshatit Shetaj, konkretisht shtetasit B. K., E. R., Y. R. dhe O. R. janë konfliktuar me sende të forta, me përfaqësues të kishës katolike, shtetasit N. S., M. F., M. L. dhe P. D.
Nga veprimet e para hetimore ka rezultuar se konflikti ka nisur gjatë kohës kur përfaqësuesit e kishës katolike po bënin rrethimin e pronës për të cilën kanë certifikatë pronësie. Banorët e zonës nuk i kanë lejuar që të bëjnë këtë rrethim pasi edhe ata kanë një certifikatë pronësie, që pretendojnë se e kanë po për këtë pronë.
Konflikti midis këtyre shtetasve ka agravuar me përdorimin e sendeve të forta, pas konfliktit me grushte. Në vendngjarje është gjetur dhe 1 gëzhojë arme zjarri.
Si pasojë e konfliktit me sende të forta kanë pësuar dëmtime të lehta disa nga shtetasit e përfshirë në konflikt, të cilët pasi kanë marrë ndihmë mjekësore, janë shoqëruar bashkë me shtetasit e tjerë të përfshirë në konflikt, me qëllim kryerjen e veprimeve për sqarimin e rrethanave të ngjarjes.
Në drejtimin e Prokurorisë vijon puna për sqarimin dhe dokumentimin e plotë ligjor të rastit të sotëm.
Sqarojmë se në lidhje me pretendimet e palëve për certifikatën e pronësisë, nga ana e Policisë janë referuar disa herë materialet në Prokurori, për konfliktet që ka patur herë pas here, mes palëve.”
Gjak dhe armë për pronat në Kepin e Rodonit, policia vetëm mbledh gëzhojat!
