Një 38-vjeçar është arrestuar në Përmet pasi ka qëlluar aksidentalisht me armë gjahu kushëririn e tij.
Ngjarja ka ndodhur në fshatin Munushtir i Vjetër, ku shtetasi me iniciale G.B, është plagosur me armë nga kushëriri teksa kishin dalë për gjueti. 37-vjeçari raportohet se ndodhet jashtë rrezikut për jetën.
“Menjëherë pas marrjes së njoftimit se në Urgjencën e spitalit të Përmetit, kishte shkuar i plagosur shtetasi G. B., 37 vjeç, shërbimet e Komisariatit të Policisë Përmet kanë kryer të gjitha veprimet e nevojshme procedurale për zbardhjen e rrethanave të rastit.
Nga hetimet rezultoi se 37-vjeçari ishte plagosur aksidentalisht, me armë gjahu, nga kushëriri i tij, në fshatin Munushtir i Vjetër, teksa kryenin gjueti të kundërligjshme.
Në vijim të veprimeve procedurale u arrestua autori 38-vjeç, banues në fshatin Munushtir, për veprat penale “Plagosja e rëndë nga pakujdesia” dhe “Dëmtimi i specieve të mbrojtura të florës dhe faunës së egër”. Gjithashtu, u sekuestrua në cilësinë e provës materiale, arma e gjahut e 38-vjeçarit”,- njofton Policia.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Gjirokastër, për veprime të mëtejshme.
