Përgjatë 9 muajve, në rrugët e qytetit të Durrësit janë regjistruar 78 aksidente rrugore, me pasojë 18 të vdekur, 20 të plagosur rëndë dhe 69 persona të plagosur lehtë.
Aksidentet, ku të përfshirë janë një mjet dhe këmbësorët, janë më të shpeshtat.
43 të tilla, me 11 humbje jete dhe 11 të plagosur rëndë, janë regjistruar në periudhën janar- shtator, referuar statistikave të Drejtorisë Vendore të Policisë.
“Shkelës të rrugës në rastin konkret janë dhe këmbësorët, dhe unë nuk e di që sot që flasim ndonjë këmbësor për shkeljet që ka bërë të jenë marrë masa kundrejt tij. Jemi në një kohë që duhet të reagojmë”, Agron Beja, ekspert rrugor.
Një tendencë që po vihet re kohët e fundit është ulja e numrit të aksidenteve gjatë orëve të mbrëmjes 19.00-24.00. Eksperti na tregon kur janë oraret më të rrezikshme tashmë.
“Krijohet një situatë shumë e vështirë, në pikun që lidhet me orarin e dërgimit të fëmijëve në shkolla, ose drejtpërdrejtë në oraret e fillimit të punës”, tha per Euronews Agron Beja.
Në këto kushte, Beja liston masat dhe apelon:
“Duhet të ndërhyhet, jo vetëm në sensibilizim, por, siç po ndodh kohët e fundit, dhe nëpërmjet shtimit të numrit të patrullave të policisë për kufizimin në njëfarë mase të shpejtësisë së lëvizjes, kufizimet nëpërmjet kontrollit të radarit, apo dhe kontrolle të ndryshme rutinë për përdorimin e pijes alkoolike dhe shkelje të ndryshme administrative që përdoruesit e mjeteve bëjnë”,- Agron Beja, ekspert rrugor.
“Duhet patjetër që dhe këmbësori të jetë i përgjegjshëm në momentin e kapërcimit. Të kontrollojë rrugën dhe më pas të marrë iniciativën e kapërcimit të saj.”
