Po zhvillohet në Kryesinë e Kuvendit mbledhja e radhës së grupit parlamentar të koalicionit “Partia Demokratike-Aleanca për Ndryshim”. Kjo mbledhje e deputetëve demokratë vjen pas rrëzimit të komisioneve hetimore, si edhe përjashtimit të 8 deputetëve nga Komisioni i Etikës, me pretendimin se nuk lejuan zhvillimin e seancës plenare të radhës së kaluar.
Burime për mediat bëjnë me dije se Bardhi u ka thënë deputetëve se të gjithë do duhet të kenë një qëndrim për çdo çështje në përballje me qeverinë, ndërsa sipas tij PS ka bllokuar çdo hapësirë institucionale.
“Do të duhet të kemi një qëndrim. Mazhoranca po na bllokon çdo hapësirë institucionale. Kanë asgjësuar parlamentarizmin”, tha Bardhi në mbledhje.
Ndërkohë, kreu i PD-së, Sali Berisha ka thënë se duhet të fillojnë qëndresën parlamentare dhe se nuk do të bojkotojnë Kuvendin, por duhet të bëjnë çdo gjë për të krijuar hapësirën e tyre në parlament.
“Duhet të fillojmë qëndresën tonë si parlamentarë. Ne nuk bojkotojmë. Kjo është në interesin e Ramës, por do të bëjmë gjithçka për të krijuar hapësirën tonë si parlamentarë”, tha Berisha në mbledhje.
Të njëjtin qëndrim ka mbajtur edhe deputeti Oerd Bylykbashi, i cili thotë se duhet të rrinë në Kuvend e të përplasen.
“Ne kërkojmë hapësirën tonë në Kuvend e këtë nuk e fitojmë duke u larguar. Ne duhet të qëndrojmë aty e të përplasemi. Betejën do duhet ta bëjmë të fortë në seancë dhe në komisione”, tha Bylykbashi.
