Kryeministri i Kosovës, Albin Kurti ka bërë me dije pak minuta më parë se është nisur drejt Tiranës për të ndjekur nga shkallët e stadiumit “Air Albania”, Shqipërinë në përballjen me Çekinë, ndeshje e vlefshme për kualifikueset e kampionatit europian 2024.
Kurti ka postuar një foto në rrjetet sociale, ku shihet se në këtë udhëtim shoqërohet nga djali i komandantit legjendar, Adem Jashari, Lulzimi.
“Bashkë me Lulzim Jasharin rrugës për Tiranë në përkrahje të Shqipërisë. Forca djema. Evropiani po na pret.” – shkruan Kurti.
Vlen të theksohet fakti se aktualisht, marrëdhëniet mes Kurtit dhe kryeministrit Edi Rama janë të tensionuara për shkak të qëndrimeve të ndryshme në lidhje me dialogun Kosovë-Serbi dhe sulmin terrorist të 24 shtatorit në veri. Mbetet për t’u parë nëse a do të ketë komunikim mes tyre sot në stadium, a do të qëndrojnë pranë njëri-tjetrit apo jo.
