Kryetari i Partisë Demokratike, Sali Berisha u shpreh këtë të enjte se fjalimi i kryeministrit Edi Rama mbajtur në foltoren e institucionit më herët gjatë ditës, është shkruar në zyrat e Aleksandër Vuçiçit.
Nga foltorja e Kuvendit, Berisha tha se fjalimi kishte për qëllim kryesor të portretizonte si “djall me zile” kryeministrin e Kosovës Albin Kurti, në prag të samitit të Procesit të Berlinit në Tiranë.
“Sot jam këtu për të denoncuar përsëri atë që populli e Kosovës e quan vëllau i Vuçiçit, analistë të mirënjohur perëndimorë e quajnë Pashiqi shqipfolës, kurse PD e ka shpallur prej vitesh argat i Vuçiçit dhe i Beogradit. E denoncoj sot sepse në një kohë kur u arrit një konsensus për t’i dhënë mbështetje të plotë rezolutës së Republikës së Kosovës, ai lexoi këtu një fjalim të shkruar fjalë për fjalë dhe rresht për rresht në Beograd. Sot, kreu juaj kishte ndërruar fjalimshkruesin. Fjalimi që lexoi këtu para jush është fjalim i shkruar në zyrat e Aleksandër Vuçiçit. Ky fjalim kishte qëllim kryesor, në prag të samitit të Procesit të Berlinit në Tiranë, të portretizonte si djall me zile, kryeministrin e Kosovës. Kishte qëllim të mbronte padronin e tij, serbomadhin Aleksandër Vuçiç. Kishte për qëllim të bllokonte çdo lloj përpjekje që mund të bëhej për ndonjë hap pozitiv në drejtim të klimës midis Serbisë dhe Kosovës, klimë konflikti pas agresionit të grupeve terroriste, të dërguara nga Serbia, të armatosura në Serbi. Dhe të strehuara tani në Serbi”, tha Berisha.
Kryedemokrati u shpreh se Rama në bashkëpunim me Presidentin e Serbisë Vuçiç kanë për qëllim ndarjen e Kosovës.
“Unë garantoj shqiptarët se Edi Rama vazhdon si argat i Vuçiçit, çdo ditë dhe çdo javë dhe muaj, përpjekjet për zbatimin e projektit të tyre të ndarjes së Kosovës. Ata kanë një qëllim dhe vetëm një qëllim, ndarjen e Kosovës sipas oreksit serb. Sipas projektit të serbomadhisë. Ju këtu, çfarë t’u them unë ju këtu, ju jeni zero pas një numri. Ne ramë dakord për një rezolutë, në të cilën mbështetet pikë për pikë, nen për nen rezoluta e Kuvendit të Kosovës. Kurse kreu juaj, Pashiqi shqipfolës, vëllai i Vuçiçit, argati i Vuçiçit, këtu në një fjalim të stilit të Muamer Gadafit, një orë e gjysmë, bëri gjithçka për të vazhduar përçarjen midis Shqipërisë dhe Kosovës. Sulmoi egërsisht kryeministrin e Kosovës. Përsëri shpalli projektin e ndarjes së Kosovës, të vendosjes së veriut të Kosovës nën kontrollin e KFOR-it. Përsëri përsëriti tezat e Vuçiçit për tokën e askujt. Përsëri foli për dallime ideologjike. Po ku ke ideologji ti? Ideologjia jote është e një tradhtari, e një hajduti, e një banditi të lidhur me Belivukër dhe stër-belivukër. Dhe flet për ndarje të tilla ti këtu”, u shpreh.
“Ideologjia jote, shtoi duke iu referuar kreut të qeverisë, është e tëra në kurriz të Kosovës dhe dëmtim të çështjes së saj”.
Ai foli për takime të fshehta mes Ramës dhe Vuçiçt dhe kujtoi mbështetjen e tij në projektin për ndryshimin e kufijve të Kosovës.
“Ka 10 vite që kur erdhi në pushtet, çfarë bëri? Një çështje të mbyllur në mënyrë përfundimtare, ndryshimin e kufijve, e hapi në takimin e parë me Vuçicin. Nga ai takim gjer më sot janë bërë 13 takime, publike apo të fshehta, në të cilat ka pasur vetëm një çështje në axhendë: ndarja e Kosovës. Edhe në takimin e fundit në Nju Jork, u informua për skenarin e Radioçiçit, të cilën Policia e Kosovës ua plasi në dorë”, deklaroi Berisha.
Ai i bëri thirrje “komunitetit ndërkombëtar” të ndalojë bashkëpunim Rama-Vuçiç që sipas tij, është faktor destabilizues për rajonin.
“Në histori, ky është i vetmi në Europë, që jashtë çdo lloj turpi, shpall Vuçiçin si faktor paqeje. A e dëgjoni që nuk përmend ndonjëherë Serbinë, në një kohë kur rezoluta që do votojmë, fillon me agresionin e Serbisë në Kosovë, vazhdon me agresionin e Serbisë në Kosovë? Guxon ky ta përmendë Serbinë? Jo mo kurrë. Ky është peng, ky është argat, ky ka firmosur diku për të ndarë Kosoën me oreksin e Serbisë. Pasi dështoi me ndryshimin e kufijve, kaloi te Ballkani i Hapur dhe doli kreu juaj bashkë me Vuçicin në krah dhe paraqiti hartën pa Kosovën. Pra, e vërteta është se 10 vite që jemi në pozicione të kundërta, ne do e votojmë rezolutën sepse rezoluta shpreh pikë për pikë ato që thotë rezoluta e Kosovës dhe dy-tre nene që nuk janë maksimumi, por përsëri përmbytin çdo gjë të politikës që ka ndjekur Edi Rama kundër Kosovës dhe qeverisë së saj”, tha Berisha.
