Në emisionin “Debat” të kësaj të mërkure në A2 CNN po diskutohet në lidhje me protestën disa ditore tashmë të studentëve të mjekësisë, të cilët kundërshtojnë vendimin e qeverisë, sipas të cilës studentët do duhet të paguajnë tarifën prej 240 mijë lekëve në vit, ose do të detyrohen që të kryejnë tre vite punë në Shqipëri.
I ftuar ishte në studio edhe studenti i vitit të katërt i Mjekësisë, Zino Veleshnja, i cili deklaroi se zgjidhjet për situatën e krijuar janë dy: e para zgjidhja juridike nëpërmjet një padie që ata do ta dorëzojnë në Gjykatën Kushtetuese. Dhe e dyta, sipas Veleshnjës, zgjidhja politike, pasi politika është ajo që e nisi këtë problematikë dhe është po ajo që duhet t’i japë zgjidhje.
“Zgjidhja e situatës së krijuar mund të vijë në dy drejtime. Së pari kemi zgjidhjen juridike, që ka të bëjë me një padi, të cilën ne do ta dorëzojmë në Gjykatën Kushtetuese besoj brenda pak ditëve.
Dhe së dyti është zgjidhja politike, që në fakt do të ishte zgjidhja optimale, pasi problematika ka nisur nga politika dhe duhet të marrë zgjidhja nga ajo. Ne presim një hap pas nga ekzekutivi për të anuluar ligjin e miratuar.
Ne kërkojmë ngritjen e një tryeze të përbashkët dhe gjetjen e zgjidhjeve që do të ishin “win-win”, pra përfituese jo vetëm për sistemin shëndetësor, por edhe jo detyruese apo shkelëse e të drejtave të njeriut.” – tha Zino Veleshnja.
