Studentët e Mjekësisë, kanë marshuar nga UMT drejt Ministrisë së Arsimit, mesditën e kësaj të mërkure për të kundërshtuar vendimin e qeverisë që i detyron të qëndrojnë për 5 vite në vend, pas përfundimit të studimeve.
Me thirrjet “Ministria e turpit”, ata njëzëri janë bashkuar në këtë protestë, teksa kanë shprehur revoltën e tyre duke hedhur vezë dhe manekina në drejtim të godinës së Ministrisë.
Rikujtojmë se sipas vendimit, studentët që nisin këtë vit studimet, duhet të qëndrojnë për 5 vite ne vend. Studentët e Mjekësisë nga viti i dytë deri në të katërt do duhet të punojnë në Shqipëri për 3 vjet, ndërsa ata që janë në vitin e pestë dhe të gjashtë do duhet të punojnë 2 vjet me detyrim për të tërhequr diplomën, ndryshe do paguajnë koston reale të studimeve të tyre në Shqipëri.
Ndërkohë që alternativa e dytë që u paraqitet studentëve që janë aktualisht në sistem, pra nëse nuk do duan që pas diplomimit të qëndrojnë për dy apo tre vite në Shqipëri, ata do të paguajnë koston e plotë të studimeve por për vitet që kanë mbetur.
