Erzeni fitoi minimalisht në derbi ndaj Teutës, në ndeshjen e javës së tetë në Superiore.
Një gol i shënuar nga Kacbufi i dha fitoren shijakasve, që rikthehen te suksesi në kampion. Pjesa e parë u mbyll me rrjeta të paprekura, ndërsa goli i vetëm u shënua në minutën e 79-të. Me këtë fitore Erzeni ngjitet në vendin e gjashtë me 11 pikë, ndërsa Teuta mban vendin e tetë me 8 pikë.
Në takimin tjetër, Partizani triumfoi me rezultatin 4-3 ndaj Kukësit.
Një ndeshje spektakolare, me shtatë gola të shënuar, por në fund me tre pikët doli Partizani. Të kuqtë e nisën vrullshëm, teksa shënuan dy gola të shpejtë me Carën në minutën e 2-të dhe Bintsouka në minutën e 5-të. Verilindorët reaguan mirë dhe ngushtuan diferencat falë një goli të Salami në minutën e 25-të.
Në minutën e 44-t, ishte sërish Bintsouka, i cili shënoi të tretin për Partizanin, ndërsa i njëjti autor shënoi edhe të katërit. Verilindorët nuk u dorëzuan dhe ia dolën të shënojnë dy herë, duke luftuar deri në fund, por nuk ia dolën të marrin të paktën në barazim.
