Kryetari i Partisë Demokratike, Sali Berisha akuzoi se Erion Veliaj ka ushtruar ndikimin e tij për të lehtësuar pozitën e ish-deputetit socialist dhe ish-sekretarit të Ministrisë së Mjedisit, Alqi Bllako përballë drejtësisë.
Këtë të enjte, Gjykata e Posaçme dha vendimin final për dosjen hetimore të inceneratorit të Elbasanit. Alqi Bllako ishte i vetmi nga të pandehurit që mori pafajësi nga gjykata. Ndërsa Prokuroria e Posaçme e akuzoi atë për shpërdorim detyre, GJKKO e cilësoi të pafajshëm.
Lidhur me vendimin reagoi kreu i PD-së Sali Berisha, gjatë fjalës së tij nga foltorja e Kuvendit këtë pasdite. Berisha tha se pas vendimit të pafajësisë fshihet dora e kryebashkiakut të Tiranës Erion Veliaj.
“…Po djegësat? Institucionet ndërkombëtare thonë se 90 përqind janë zhdukur paratë. Ku janë 200 milionë euro të taksapaguesve? Ku janë? A e morët vesh që Alqi Bllakon e liruan? E liruan për shkak të Erion Hajdutit. E liruan për shkak të Erion Veliajt. Sepse ka zbatuar skemën më kriminale 1-miliardëshe. Dhe mirë ia bënë Lefterit, shumë mirë ia bënë, që nuk i nxjerr të gjitha”, u shpreh kryedemokrati.
Më herët, ai ka bërë të njëjtat akuza edhe pas verdiktit të GJKKO për dosjen e inceneratorit të Fierit.
Për këtë rast, një javë më parë, ish-deputeti u dënua për shpërdorim detyre me 2.8 vite burg. Ai ishte akuzuar edhe për korrupsion nga SPAK, që konkludoi se Alqi Bllako ka përfituar 15 milionë lekë nga kompania e incineratorit të Fierit. Por, në vendimin final, Bllako u dënua vetëm për shpërdorim detyre. Berisha ka deklaruar se akuza e korrupsionit ra ndaj ish-deputetit socialist ra pikërisht për shkak të ndikimit të Veliajt. Ky i fundit ndërkohë, nuk i ka komentuar deklaratat e Berishës gjatë prononcimeve publike.
