Ruenca Haxhia, në vilën e së cilës u gjetën nga policia vazo me kanabis, do të vijojë të hetohet në gjendje të lirë. Prokuroria e Tiranës, që kërkoi arrest me burg ndaj këngëtares si ankim ndaj vendimit të shkallës së parë, është tërhequr nga kjo kërkesë.
Arrestimi
Enca u arrestua në 12 Shtator. Aksioni i bluve i koduar “Balcony”, siç njoftoi vetë policia, erdhi “pas informacioneve të siguruara nga inteligjenca policore se një shtetase kishte kultivuar bimë narkotike, në ballkonin e banesës së saj”. Në ballkonin e vilës së këngëtares në Lundër, u sekuestruan nga policia pesë vazo me bimë kanabisi.
Teksa efektivët mësynë në banesën e Encës, aty ishte dhe i dashuri i saj – një shtetas i huaj, i cili u shoqërua nga policia dhe më pas u la i lirë.
Referuar materialit të referuar nga policia në prokurorinë e Tiranës, Enca Haxhiaj ka pranuar se është përdoruese e kanabisit. Ajo sqaronte se bimët i ka mbjellë vetë, për kuriozitet dhe për nevojat e saj personale. Në raport thuhet se bimët narkotike në ballkonin e banesës së këngëtares në katin e 4 në Lundër, kishin arritur nga 1.1 deri në 1.3 metër.
Lirimi nga qelia
Vetëm dy ditë qëndroi në qeli 27-vjeçarja, teksa gjykata e Tiranës, më 14 Shtator, e liroi në seancën për masën e sigurisë.
Prokuroria kërkoi arrest me burg, ndërsa mbrojtja kërkoi që arrestimi të cilësohej i paligjshëm dhe të mos aplikohej masë sigurie për 27-vjeçaren. Gjatë seancës, avokati i këngëtares pretendoi se ajo e ka mbjellë bimën narkotike “për kureshtje”.
Në fund, gjykata e cilësoi të ligjshëm arrestimin dhe caktoi detyrim paraqitje për Ruenca Haxhian, duke e liruar nga qelia.
Pas ‘aventurës’ në burg, Enca është shfaqur aktive në rrjetet sociale. Në një postim në Instagram disa ditë më parë, ajo pozon me bikini në pishinën e një vile. Në përshkrimin që shoqëron foton shkruan: “e bekuar”.
Prokuroria tërhiqet nga ankimi, Apeli e lë të lirë
Masa u ankimua në apel nga të dyja palët. Mbrojtja kërkoi vlerësimin si të paligjshëm të arrestimit dhe rrëzimin e kërkesës për caktimin e masës së sigurimit personal. Ndërsa prokuroria kërkoi prishjen e vendimit të shkallës së parë dhe caktimin e masës së sigurimit personal shtrëngues atë të “arrestit në burg”.
Seanca në Apel u mbajt këtë të martë dhe u mbyll me vendimin e hetimit të Encës me të njëjtën masë sigure të vendosur nga shkalla e parë, pasi organi i akuzës ndyshoi qëndrim, duke u tërhequr nga ankimi.
Gjyqtarja Elona Mihali vendosi mospranimin e ankimit të personit nen hetim Ruensa Haxhiaj duke argumentuar se shkak se ankimi është ushtruar jashtë afatit ligjor.
Po ashtu, në një njoftim zyrtar, gjykata sqaron se u vendos mospranimi i ankimit të Prokurorisë “për shkak te heqjes dorë nga ankimi nga ana e Prokurorisë”.
