Të tjera dëshmi janë zbardhur lidhur me vdekjen e 50-vjeçare shqiptare në Greqi, e cila ishte duke pastruar një makineri grirëse mishi, kur kjo e fundit u ndez duke i marrë keshtu jetën.
Ngjarja tragjike që tronditi Messolongjin ndodhi para syve të vajzës 18-vjeçare e cila po e ndihmonte në dyqanin ku ajo punonte.
Babai i pronarit duke folur për mediat greke ka treguar versionin e tij të ngjarjes tragjike. Ai thotë se gruaja e ndezi butonin e makinerisë që ta pastronte më lehtë.
“Gruaja po pastronte makinerinë. Ajo ndezi butonin që ta pastronte më lehtë. Por cilindri filloi të rrotullohej, e bllokoi brenda dhe ajo vdiq menjëherë. Ky buton ka një siguresë pranë, ajo e hapi për ta pastruar më lehtë. Në fillim i kapi shpatullën dhe pastaj qafën. Nuk ndodhi asnjë copëtim, asnjë pikë gjak nuk derdhi. Kështu ndodhi aksidenti, askush nuk donte të ndodhte. Ishte një grua e varfër që ne e mbanim. Ajo punonte nga mëngjesi në mbrëmje për fëmijët e saj.
Dhe e gjithë kjo para syve të vajzës së saj 18-vjeçare, e cila shkoi me të për ta ndihmuar. Një fqinj dëgjoi britmat e vajzës së vogël dhe vrapoi në dyqan për të parë se çfarë ndodhi”.
Të afërmit dhe miqtë e shqiptares, nënë e dy fëmijëve 18 dhe 10-vjeç e përshkruajnë atë si një person punëtor që luftoi për të përballuar jetesën.
“Ajo ishte një zonjë, një nënë, një heroinë për fëmijët e saj. Unë fola me të 3 orë para se të shkonte në punën që i mori jetën. Ajo kishte frikë nga vdekja, kishte dy fëmijë. Biseduam si gjithmonë, mendonte shumë për jetën e fëmijëve, punonte nga mëngjesi në mbrëmje për të fituar bukën e fëmijëve. Të gjithë e respektonin dhe e donin, ishte një grua punëtore.
Ajo kishte një familje shumë të mirë, vetë ishte një zonjë shumë e mirë. Ajo ishte miqësore, e buzëqeshur. Ajo ka dy fëmijë, një vajzë, një djalë, kujdesej për punën e saj, shtëpinë e saj. Si është e mundur kjo? Si ndodhi kjo?”
