Në Beograd, tifozët e Crvena Zvezdës kanë nderuar terroristin e vrarë në Banjskë të Kosovës një javë më parë. Në ndeshjen e raundit të 10-të në Superligën serbe të futbollit, tifozët e Zvezdës (Delie) heshtën për 31 minuta në nderim të Stefan Nedeljkovic, që mbeti i vrarë në dyluftimet me policinë speciale të Kosovës.
Në “Maracana” tifozët i kushtuan edhe një koreografi speciale 31 vjeçarit, teksa qëndruan po për kaq minuta në heshtje dhe më pas brohoritën duke kënduar edhe këngë nacionaliste. Stefan Nedeljkovic njihej si tifoz i Crvenës dhe në stadium ishte edhe një foto e tij.
Kujtojmë se në 24 shtator një grup i armatosur u fut nga Serbia në Kosovë dhe la të vrarë policin Afrim Bunjaku (Dëshmor i Atdheut) në Banjskë. Për këtë policia kosovare ndërhyri duke sprapsur rrezikun dhe lënë të vrarë tre nga terroristët e grupit që kishte një armatim të rëndë, i cili u sekuestrua nga forcat e rendit në Kosovë.
