Dy shtetas janë vënë në pranga dhe dy të tjerë janë proceduar mëngjesin e kësaj të premte, pasi tentuan të fusnin mijëra euro nëpërmjet pikës kufitare të Muriqanit pa i deklaruar.
Blutë bëjnë me dije se në pranga kanë rënë pronari e drejtuesi i autobusit, në kroskotin e të cilit ishin fshehur 82 010 euro, të dyshuara të përfituara nga veprimtari kriminale.
Paratë u sekuestruan me cilësinë e provës materiale. Në kuadër të këtij operacioni të koduar ‘Directions’, policia kufitare gjeti dhe sekuestroi 48 100, gjithashtu të fshehura në një autobus pas një kontrolli të imtësishëm që ushtroi. Në pranga ra një 35 vjeçar që tentoi t’i nxirrte nga vendi ynë pa i deklaruar ato.
“Në bashkëpunim me shërbimet e Policisë së Shkodrës, u finalizua operacioni policor i koduar “Directions”. Si rezultat i operacionit u vunë në pranga shtetasit R. A., 36 vjeç, banues në Shijak dhe S. F., 54 vjeç, banues në Elbasan, si dhe u referuan materialet në Prokurori ku nisi procedimi në gjendje të lirë për shtetasit A. C., 53 vjeç, banues në Elbasan dhe K. M., 56 vjeç, banues në Mamurras.
Shërbimet e Policisë Kufitare, në hyrje të vendit, ushtruan kontrolle të imtësishme, në vijë të dytë, në autobusin në pronësi të 36-vjeçarit (me drejtues shtetasin S. F. dhe me drejtues alternativë shtetasit A. C. dhe K. M.). Nga kontrollet, në një çantë të fshehur në kroskotin e autobusit, u gjetën 82 010 euro, të dyshuara të përfituara nga veprimtari kriminale, të cilat do të futeshin në vendin tonë, pa u deklaruar. Paratë u sekuestruan me cilësinë e provës materiale”,-njofton Policia.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Shkodër, për veprime të mëtejshme, për veprat penale “Mosdeklarimi në kufi i të hollave dhe i sendeve me vlerë” dhe “Pastrimi i produkteve të veprës penale ose veprimtarisë kriminale”.
