Kandidati i PS Albert Halilaj kryeson zgjedhjet në Kukës me një diferencë prej 4 814 votash, teksa mbeten për tu numëruar 10 kutitë e fundit.
Sipas të dhënave nga KQZ, nga 64 qendra votimi të numëruara (74 në total), Albert Halilaj numëron 11 260 vota. Ndërsa rivali i tij Emri Vata, nga koalicioni opozitar “Bashkë Fitojmë” 6 446 vota.
Kryeministri dhe kreu i PS, Edi Rama, përmes një postimi në “FB” më herët gjatë ditës, shpalli fitoren duke u shprehur se avantazhi tashmë është i “pakthyeshëm”. Sipas tij, fitorja e PS “flet qartë për besimin dhe për pritshmërinë e qytetarëve kuksianë ndaj nesh, si edhe për detyrimin tonë të madh ndaj tyre, për të bërë shumë më shumë akoma për Kukësin”.
Drejtuesi politik i PS-së në Kukës Pandeli Majko vlerësoi kandidaturën e socialistëve. “Kjo fitore i dedikohet se pari kandidaturës së mrekullueshme që ky komunitet përzgjodhi, ai është Albert Halilaj. Më pas ka të bëjë me disa gjëra që ky qytet i shpreh pa folur. E ka të veçantë këtë se duhet të jesh i kujdesshëm se duket sikur të përkrah, por mund të ndodhë e kundërta. Kukësi na ka futur në një borxh shumë të thellë”, tha Majko në një deklaratë për gazetarët.
Përfaqësuesit e opozitës nuk kanë reaguar ende lidhur me rezultatin që shënon një humbje më të thellë se në 14 Maj, kur Safet Gjici i PS fitoi ndaj rivalit të “Bashkë Fitojmë” Admir Sinamati me 2 031 vota diferencë.
Kuksianët votuan të dielën për të zgjedhur kreun e ri të bashkisë. Në krahasim me 14 Majin kur u mbajtën zgjedhjet vendore, pjesëmarrja dje ishte më e ulët. Sipas të dhënave paraprake, kutive të votimit i janë drejtuar rreth 4 mijë votues më pak.
Procesi i votimit ishte përgjithësisht i qetë. Përfaqësues të koalicionit opozitar ‘Bashkë Fitojmë’ denoncuan gjatë paradites së të dielës prezencën në disa qendra të votimit të përfaqësuesve të PS që sipas tyre, mbanin shënim zgjedhësit që shkonin për të votuar.
Zgjedhjet në Bashkinë e Kukësit vijnë si pasojë e largimit të Safet Gjicit nga posti i kryebashkiakut, pas publikimit të video-skandalit ku ai shfaqet duke kryer marrëdhënie seksuale në zyrë me Alma Kaçin. Aktualisht, Gjici ndodhet në burg, nën masën e sigurisë arrest me burg për akuzën e korrupsionit pasiv. Në pamjet e publikuara, pas konsumimit të marrëdhënies intime me Alma Kaçin (po ashtu e arrestuar për korrupsion aktiv, tashmë nën masën e arrestit shtëpiak), shihet Gjici i cili i premton asaj një tender për sterilizimin e qenëve të rrugës.
