Liderët e Kosovës dhe Serbisë kanë fajësuar njeri-tjetrin për sulmin e ndodhur ndaj forcave të policisë së Kosovës, ku një efektiv mbeti i vrarë.
Presidenti i Serbisë, Aleksandar Vuçiç, tha se sulmi në Banjskë të Zveçanit ndodhi pasi “disa serbë të Kosovës” u rebeluan duke ngritur barrikada dhe duke nxitur më pas reagimin e policisë së Kosovës.
Në një deklaratë mediatike mbrëmjen e së dielës, ai tha se “tre serbë nga Kosova u vranë – dy nga snajperët – dy u plagosën rëndë dhe ka frikë për vrasjen edhe të personit të katërt”.
“Rreth orës 02:46 të natës së sotme, një grup serbësh nga ‘Kosova dhe Metohia’ vendosi dy kamionë si barrikada në Banjskë – në veri të Kosovës. Më pas shkoi policia e Kosovës dhe tentoi t’i largojë ato barrikada. Kishte një konflikt me serbët që vendosën barrikada dhe në atë konflikt mbeti i vrarë polici Afrim Bunjaku dhe një person tjetër u plagos”, tha Vuçiç.
“Serbët dhe jo njerëzit nga Serbia qendrore, siç gënjyen në mediat e Prishtinës, por nga Kosova u rebeluan, duke mos dashur të vuajnë më terrorin e [kryeministrit të Kosovës, Albin] Kurti”. Unë, në asnjë mënyrë, nuk dua ta justifikoj vrasjen e një polici shqiptar dhe as nuk mund ta justifikoj. Është një akt i dënueshëm dhe është diçka që nuk i duhej askujt”, tha presidenti serb.
Sipas tij, i vetmi fajtor për atë që po ndodh në veri, “është Albin Kurti”.
Vuçiç u shpreh se “ne kurrë nuk do ta njohim Kosovën e pavarur”, ndërsa theksoi se Serbia do të marrë vendime të rëndësishme në ditët në vijim, por nuk specifikoi se me çfarë kanë të bëjnë.
Kurti: Mercenarët e përkrahur nga Beogradi zyrtar
Kryeministri i Kosovës, Albin Kurti, tha më herët se nga ato që ka mësuar deri tani, bëhet fjalë për një strukturë mercenarë e cila është përkrahur politikisht dhe financiarisht nga Beogradi zyrtar.
“Urojmë që ky të jetë i fundit në këtë rrugën e vështirë për ligj e për drejtësi”, ka thënë Kurti.
“Kemi të plagosur dhe 3 të vrarë prej tyre dhe gjithashtu të arrestuar. Procesi në vijim do të na japë të dhëna se kush saktësisht janë këta dhe kush janë urdhërdhënësit e kësaj përpjekje të dështuar për ta destabilizuar Republikën e Kosovës. Nga ato që kemi mësuar deri më tani që bëhet fjalë për një formacion terrorist e kriminal i cili ka planifikuar gjatë këtë që kanë kryer sot… Bëhet fjalë për një strukturë mercenare e cila është përkrahur, politikisht dhe financiarisht nga Beogradi zyrtar”, tha Kurti.
Sulmi ndaj policisë në veri të Kosovës
Zyrtari i Policisë së Kosovës, Afrim Bunjaku, u vra të dielën në veri të Kosovës. Policia ka thënë se është sulmuar në fshatin Banjskë të Zveçanit, ku janë plagosur edhe tre zyrtarë të policisë. Si pasojë e shkëmbimit të zjarrit, Policia ka konfirmuar vrasjen e tre sulmuesve dhe arrestimin e 6 të tjerëve.
Ministri Brendshëm, Xhelal Sveçla tha se Manastiri në Banjskë është kthyer në “burim të sulmeve” dhe Policia e Kosovë ka zbuluar armatime të rënda.
Gjatë orëve të mbrëmjes, ai konfirmoi se policia ka vënë “gjithë territorin nën kontroll”, ndërsa aksioni në kërkim të sulmuesve të tjerë të Policisë së Kosovës është në vijim.
Shtetet e Bashkuara dhe Bashkimi Evropian e kanë dënuar ashpër vrasjen e zyrtarit policor.
