Përleshjet me armë zjarri ndërmjet Policisë së Kosovës dhe grupit kriminal në Banjskë të Zveçanit kanë përfunduar. Automjetet e EULEX-it janë larguar nga vendi i ngjarjes, ndërsa ministri i Brendshëm, Xhelal Sveçla konfirmoi se policia ka vënë “gjithë territorin nën kontroll”.
Ai konfirmoi se tre sulmues janë vrarë, ndërsa gjashtë janë arrestuar, dy nga të cilët të plagosur.
“Vizituam vendin e ngjarjes, ku pak pas orës tre të mëngjesit, grupe të armatosura sulmuan patrullën tonë policore, meqë rast vranë rreshterin tonë Afrim Bunjaku”, u shpreh Sveçla për gazetarët nga vendngjarja. “Kemi gjashtë të arrestuar dy nga ta të plagosur me uniformë të armatusur dhe katër të tjetër me radiolidhje, dhe së paku tre sulmues të vrarë për të cilët janë duke u bërë procedura e identifikimit”, deklaroi ministri.
Ai shtoi se “Policia e Kosovës ka zbuluar një sasi të jashtëzakonshme të armatimit të rëndë këmbësorie eksploziv, logjistikë, ushqime pajisje për barrikada, lirisht mund të themi që ishin pajisje për disa qindra sulmues të tjerë”.
Sveçla tha se aksioni në kërkim të sulmuesve të tjerë të Policisë së Kosovës është në vijim.
Ai tha se ka informacione se bëhet fjalë për “grup terroristësh”.
Po ashtu, dhjetëra pelerinë të manastirit ortodoks serb në Banjskë, që dyshohet se është përdorur si bazë nga grupi i armatosur, janë shoqëruar në polici.
Zyrtari i Policisë së Kosovës, Afrim Bunjaku, është vrarë në veri të Kosovës. Policia ka thënë se është sulmuar në fshatin Banjskë të Zveçanit, ku janë plagosur edhe tre zyrtarë policorë.
