Janë zbardhur detaje të reja nga vrasja e 39-vjeçarit shqiptar Brigen Limka nga Korça ditën e sotme në Athinë të Greqisë.
Ai u ekzekutua nga 68-vjeçari Dhimitris Kutrumanis me pushkë, pas një konflikti për një vend parkimi. Ngjarja ka ndodhur në rrugën “Praxitelous 147” në Pire ku shqiptari punonte si roje parkingu.
Mediat greke raportojnë se Kutrumanis e qëlloi një herë në kokë shqiptarin e më pas është kthyer sërish duke e qëlluar për herë të dytë. Gjithçka ka ndodhur brenda 9 sekondave dhe dy të shtëna iu deshën 68-vjeçarit grek për t’i marrë jetën shqiptarit, baba i tre fëmijëve.
Viktima dhe autori kishin pasur konflikte pasi i moshuari pengonte shqiptarin që t’u shërbente klientëve të parkimit me qira. Dëshmitarët kanë thënë se autori 68-vjeçar i cili u dorëzua në polici, njihej si person me probleme psikologjike pasi ishte konfliktuar dhe shpeshherë bërtiste.
“Mes tyre pati debat. Autori u ngjit në banesën e tij mori pushkën dhe pasi e qëlloi tha; “tani mbarova me ty”. Ai njeri kishte sjellje të çuditshme”, është shprehur një dëshmitare.
Gjithashtu një tjetër thotë se autori i vrasje shkaktonte shpesh probleme dhe debatonte me fqinjët edhe për gjëra të parëndësishme.
“Autori krijonte vazhdimisht probleme në parking. Shumë herë hidhej mbi makina dhe nuk ngrihej dhe sot mori pushkën dhe kishte një problem me parkimin sepse banonte pikërisht sipër. Ai jetonte vetëm. Viktima nuk ka qenë kurrë problem. E dëgjuam duke thirrur për ndihmë dhe më pas dëgjuam të shtënat. Ai thirri fëmijët nga parkingu ngjitur. Pati dy të shtëna. Njëra në kokë, tjetra në fytyrë. Viktima ka tre fëmijë të mitur. Ajo që pashë ishte tronditëse. Policia mbërriti pas dhjetë minutash. Autori ishte mbyllur në shtëpinë e tij”, tha një dëshmitar.
“Njëri zbriti nga pallati dhe qëlloi një person. Një punëtor parkingu. Ata duhet të kenë pasur ndonjë debat, sepse plaku ka zbritur me pushkë dhe e ka qëlluar dy herë në fytyrë. Jemi të tronditur. Burri kishte rënë përtokë i mbuluar me gjak. Ambulanca mbërriti pas një ore, por viktima me siguri tashmë kishte vdekur. Ne ende po dridhemi vërtet”, tha një dëshmitar tjetër.
Mediat greke kanë publikuar pamjet e rënda nga vendngjarja, ku 39-vjeçari Brigen Limka shihet i vrarë në mes të rrugës dhe i mbuluar me gjak.
