Një zjarr i madh ka rënë në një pallat 10-katësh mesditën e djeshme në rrugën “Sali Butka” në Tiranë, ku janë shkrumbuar katet e fundit të pallatit, dhe janë shkaktuar dëmet të mëdha në apartamentet e kateve të tjera.
Një banor i këtij pallati duke folur për mediat u shpreh se ai ka qenë i pari që ka parë zjarrin dhe ka dalë menjëherë jashtë. Ai ka thënë se do flejë jashtë në stol pasi policia nuk i lejon të futen në apartamentet e tyre.
“S’e dimë ende sa dëme kemi nuk na lënë të futemi. Unë isha brenda kur mori flakë apartamenti. Filloi nga kati sipër isha i pari që kam dalë dhe pashë zjarrin. Zjarrfikësja ka ardhur menjëherë por zjarri u përhap shumë shpejt. Policia ndërhyri menjëherë për të nxjerrë banorët sepse as ata nuk e prisnin të bëhej kështu. Zjarri u përhap menjëherë. Unë banoj në katin e 5. Sonte do të fle te stoli”,- u shpreh banori.
