Viti i ri shkollor 2023-2024 i ka gjetur shkollat e Durrësit me një numër të shtuar të oficerëve të sigurisë.
Jo vetëm në shkollat e mesme, tashmë punonjës sigurie ka edhe në arsimin 9-vjeçar, duke e çuar në 19 totalin e shkollave, që e ofrojnë këtë shërbim.
“Në dijeninë time, në zbatim të vendimeve të Këshillit të Ministrave, të gjithë shkollat me mbi 700 nxënës janë pajisur me oficer sigurie. Unë jam dhe drejtues i Rrjetit të Oficerëve të Sigurisë për ZA në Durrës dhe jemi 19 kolegë që jemi shtrirë nëpër këto shkolla sipas VKM-së përkatëse”, thotë Aleksandër Gjeçi, oficer sigurie.
Ata synojnë të ndihmojnë në parandalimin e dukurive negative, si brenda dhe jashtë mjediseve të shkollës.
“Roli kryesor i oficerit të sigurisë është krijimi i një mjedisi të sigurt dhe miqësor për nxënësit, jo vetëm brenda ambienteve të shkollës, por edhe rreth perimetrit të jashtëm”, shprehet Gjeçi.
Ndërsa më parë shihej me mosbesim, tashmë ky pozicion i ri pune po kthehet në një hallkë kyçe, në “zinxhirin” e gjatë të sistemit arsimor.
“Unë mendoj se çdo vit po bëhen hapa të rëndësishëm për krijimin e një klime të sigurtë dhe miqësore. Është rritja e ndërveprimit dhe më kryesorja bashkëpunimi i mirë që kemi, sepse oficerët e sigurisë shërbejnë dhe si ajo ura lidhëse ndërmjet të rinjve, policisë dhe shkollave për të bërë të mundur gjithë sa thamë më sipër”, thotë ai.
Para nisjes së vitit të ri shkollor 2023-2024, ministri i brendshëm Taulant Balla paralajmëroi nga Durrësi, se brenda këtij muaji do të propozojnë një paketë ligjore për ashpërsimin e dënimit, për veprat penale që kryen brenda perimetrit të sigurisë në shkolla.
