Çmimi i karburanteve në tregun vendas ka filluar një trajektore të pandalshme rritje teksa nafta po shtrenjtohet çdo ditë mesatarisht me 1 lekë për litër. Kompanitë e naftës kanë njoftuar klientët e tyre të mëdhënj se të premten çmimi me shumicë i naftës do të rritet në 190 lekë për litër.
Por ky është çmimi i shumicës. Për karburantin me pakicë që blejnë qytetarët, shtohen të tjera taksa dhe kosto që e rrisin akoma më shumë çmimin.
Disa nga kompanitë e tregtimit kanë filluar ndërkohë të përditësojnë tabelat duke e çuar çmimin e naftës me pakicë në 205 lekë për litë. Ky është një shtrenjtim me mbi 9 lekë krahasuar me çmimin ekzistues.
Që nga mesi i Korrikut, çmimi i naftës me pakicë është rritur 5 herë rresht duke u shtrentuar me 30 lekë për litër gjithsej.
Kompanitë e tregtimit të karburanteve thonë arsyeja e rritjes është shtrenjtimi i naftës në bursë. Çmimi i naftës në tregjet ndërkombëtare kërceu në 90 dollarë për fuçi këtë të enjte për herë të parë që nga nëntori i vitit të kaluar.
Këta herë kryqëzata e karburanteve po diktohet nga ulja e përbashkët e prodhimit nga Arabia Saudite dhe Rusia, të cilat lajmëruan se kjo politikë do të vazhdojë të paktën deri në fund të vitit.
Taksat mbajnë naftën e lartë
Krahas rritjes në bursa, një tjetër faktor që i mban çmimet e naftës të larta është barra e rëndë e taksave që rëndojnë mbi këtë produkt. Pesha e taksave përbën gati 60 për qind të çmimit të naftës.
Përveç TVSH-së, akcizës e taksës së qarkullimit, rreth 8 lekë të tjera për litër shkojnë për taksa të tilla si markim, skanim, kolaudim, rilicencim, që në pjesën më të madhe kanë rezultuar të panevojshme.
Muajin e kaluar qeveria vendosi të shtyjë edhe për një vit kontratën e markimit të karburanteve, që ka një kosto, që paguhet në çmim nga konsumatorët prej rreth 5-6 milionë euro në vit.
