Një 38 vjeçar është arrestuar ditën e sotme nga policia, dhe një 31 vjeçare është proceduar pasi akuzohen për zjarrvënie.
Rasti i parë është regjistruar në lagjen “18-Tetori”, ku shtetasi me iniciale, B.M akuzohet se aksidentalisht ka djegur një stan dhe 4000 dengje me bar.
-“Specialistët për Hetimin e Krimeve të Komisariatit të Policisë Lushnjë arrestuan në flagrancë shtetasin B. M., 38 vjeç, banues në Lushnjë, pasi motokorrësja me të cilën punonte në tokën e tij, ka lëshuar shkëndija që kanë shkaktuar zjarr. Nga përhapja e flakëve është djegur një stan në pronësi të një shtetasi tjetër dhe 4000 dengje me bar që ishin brenda stanit”,- njofton Policia.
Rasti tjetër është regjistruar në fshatin Golem, ku shtetasja me iniciale M.L, nga pakujdesia ka djegur një parcelë me ullinj.
“-Po këta specialistë kanë referuar materialet procedurale në Prokurori, ku ka nisur procedimi në gjendje të lirë për shtetasen M. L., 31 vjeçe, banuese në Golem i Madh, pasi nga pakujdesia, ka ndezur zjarr në tokën e saj, dhe si pasojë është djegur një sipërfaqe toke e mbjellë me ullinj, në pronësi të një shtetasi tjetër”,- njofton Policia.
