Autorët e atentatit të mbrëmjes së djeshme në Vlorë, ku u ekzekutua me breshëri kallashnikovi 41-vjeçari Leartiad Keka, dyshohet se janë vrasës me pagesë.
Grupi hetimor ka dyshime të forta se automjeti i tyre, “Audi A6” ngjyrë të zezë me targa italiane është përdorur edhe në një ngjarje tjetër kriminale në veri të vendit.
Nga detajet e vrasjes së djeshëm, dyshohet se kemi të bëjmë me një atentat të mirëorganizuar nga autorë. Teksa ka qenë duke udhëtuar me motor, fillimisht 41-vjeçari është goditur nga makina e autorëve. Pasi ka rënë nga motori, Kekaj ka ecur për rreth 100 metra, ndërsa autori e ka ndjekur nga pas edhe është siguruar që ta vrasë. Më pas 41-vjeçari është qëlluar sërish para kishës Ortodokse. Në fund, autori ka zbritur nga makina dhe e ka qëlluar sërish, për t’u siguruar se e ka vrarë.
Në auomjtetin “Audi A6” ngjyrë të zezë me targa italiane të autorëve, dyshohet se kanë qenë 2-3 persona, teksa personi i cili ka qëlluar me kallashnikov ka qenë i ulur në sediljen e pasagjerit.
Në vendin e ngjarje janë gjetur 28 gëzhoja plumbash kallashnikovi, teksa Leartiad Keka ka patur plagë të shumta plumbi në trup dhe në kokë.
Pas atentatit, autorëve u është dashur 12 minuta me automjetin e tyre për t’u larguar nga qyteti i Vlorës e më pas për ta djegur atë në aksin Kote-Sevaster. Brenda automjetit të djegur është gjetur edhe kallashnikovi që dyshohet se është përdorur nga autori për të ekzekutuar 41-vjeçarin.
Policia ende nuk ka autorë të dyshuar të kësaj ngjarje, teksa zbardhja e pamjeve filmike të kamerave të sigurisë, mund të çojë në identifikimin e tyre. Deri më tani, e vetmja pistë mbetet e ajo e hakmarrjes, pasi Leartiad Keka rezulton i akuzuar nga drejtësia për një vrasje në bashkëpunim të ndodhur 23 vite më parë.
Referuar një vendimi të Gjykatës së Lartë të vitit 2005, krimi është shënuar më 18 Gusht të vitit 2000 te “Kthesa e Gushajve” pranë Llakatundit. Në atë ngjarje, që sipas hetimeve të kohës ka qenë një tentativë grabitje, ka mbetur i vrarë Vendim Malaj, ndërsa si autorë janë arrestuar dhe dënuar Leartiad Keka dhe Fjodor Mezyraj, të cilët pas një sage të gjatë gjyqësore kanë fituar pafajësinë. Për këtë krim, Leartiad Keka ka kryer rreth 10 vite burg.
Pas atentatit të djeshëm, policia ka shoqëruar disa persona për t’i marrë në pyetje, si familjarë të viktimës, por edhe protagonistë të krimit të regjistruar 23 vite më parë.
