Kreu i Komisionit Qëndror të Zgjedhjeve ka njohur Lulzim Bashën si kryetar të Partisë Demokratike, duke e regjistruar këtë forcë politike me të si kryetar për zgjedhjet e parakahshme lokale për Bashkinë e Kukësit, që do të mbahen më 24 shtator.
Kërkesë për t’u regjistruar për zgjedhjet në Kukës kishte dërguar edhe PD e Berishës, por KQZ e ka rrëzuar atë dhe ka pranuar vetëm PD e vulës.
Gjatë fjalës së tij, kreu i KQZ-së, Ilirjan Celibashi tha se kërkesa e Lulzim Bashës plotëson kërkesat e Kodit Zgjedhor dhe ligjit për partitë politike. Ai tha se KQZ e ka të pamundur të bëjë shqyrtim të procesit vendimmarrës të një partie politike. Sipas tij, KQZ është e detyruar të shohë kërkesën në aspektin formal.
“Sipas dokumentit zyrtar, Basha është kryetari. Basha ka legjitimitetin të paraqesë kërkesën për regjistrim në zgjedhje si subjekt zgjedhor.”, tha Celibashi.
Gjithsesi, për zgjedhjet në Kukës, PD e Bashës ende nuk dihet nëse do të nxjerrë kandidat apo jo, teksa Berisha pritet të futet si koalicion dhe do të garojë me kandidatin Emri Vata, i dalë nga primaret.
