Policia e Tiranës ka arrestuar një 27-vjeçar, pasi akuzohet për kallëzim të rremë. Në pranga është vënë shtetasi me inicialet B.M., banues në Kashar.
Sipas autoriteteve policore, 27-vjeçari ka bërë kallëzim të rremë për vjedhjen e një çante me dokumente dhe me një shumë parash, në automjetin e firmës ku punonte, teksa pas hetimeve çanta i është gjetur në banesën e tij, ndërsa lekët i kishte harxhuar në lojëra fati.
“Shërbimet e Komisariatit të Policisë Nr. 6, në vijim të punës për goditjen e veprimtarisë kriminale në fushën e vjedhjes së pronës dhe pasurisë, pas kallëzimit të marrë nga shtetasi B. M., 27 vjeç, banues në Tiranë, se i kishin vjedhur çantën me dokumente dhe me 190 000 lekë, në automjetin e firmës ku punonte, në lagjen “Mazreku”, Kashar, kanë nisur menjëherë hetimet për dokumentimin e plotë ligjor të rastit.
Nga veprimet hetimore ka rezultuar se shtetasi B. M. ka bërë kallëzim të rremë për vjedhjen e çantës me dokumente dhe para. Gjatë kontrollit në banesën e tij është gjetur dhe sekuestruar çanta për të cilën kishte bërë kallëzim. Gjithashtu, pas verifikimeve të kryera ka rezultuar se shumën e parave, shtetasi B. M. e ka shpenzuar për lojëra fati.” thuhet në njoftimin e bluve të kryeqytetit.
Mbi 27-vjeçarin rëndon akuza për veprën penale “Kallëzimi i rremë”. Materialet i kaluan Prokurorisë së Tiranës për veprime të mëtejshme procedurale.
