Është zbardhur ngjarja e rëndë që ndodhi një ditë më parë në kryeqytet, ku një 37-vjeçare e identifikuar si Amanda Pushani, u gjet pa shenja jete në banesën e saj.
Ngjarja ndodhi pasditen e djeshme në rrugën “Hajdar Hidri”, ku fillimisht u raportua nga familjarët se Pushani kishte ndërruar jetë për shkaqe natyrale, por nga hetimet dhe autopsia ka rezultuar se 37-vjeçarja është vrarë me thikë, pasi në trupin e saj janë konstatuar plagë të shumta.
Autore e dyshuar e krimit, është motra e viktimës, Marsela Pushani 40 vjeç, e cila është arrestuar nga policia disa orë pas ngjarjes.
Dyshohet se vrasja ka ndodhur për shkak të një debati që motrat kanë pasur me njëra-tjetrën.
“Ditën e djeshme, rreth orës 11:40, është marrë njoftim se në rrugën “Hajdar Hidri”, shtetasja A. P., 37 vjeçe, kishte ndërruar jetë dyshohet për shkaqe natyre.
Pas marrjes së njoftimit, Shërbimet e Policisë kanë kaluar menjëherë në vendngjarje, dhe pas konstatimit të trupit të pajetë të shtetases A. P., 37 vjeçe, e cila fillimisht është raportuar si vdekje natyrale nga familjarët, kanë vijuar veprimet hetimore të thelluara në lidhje me rastin, për të bërë të mundur zbardhjen e rrethanave të ngjarjes.
Pas kryerjes së autopsisë ka rezultuar se shtetasja A. P., 37 vjeçe, ka ndërruar jetë si pasojë e plagëve të marra nga një mjet prerës.
Në vijim të veprimeve, specialistët e Sektorit për Hetimin e Krimeve të Rënda arrestuan shtetasen M. P., 40 vjeç, (motrën e saj), banuese në Tiranë, për veprën penale “Vrasja për shkak të marrëdhënieve familjare”, pasi ditën e djeshme, gjatë një konflikti ka goditur me mjet prerës shtetasen A. P., e cila si pasojë e plagëve të marra, ka ndërruar jetë”,- njofton Policia.
Ndërkohë, Marsela Pushani në dëshminë e saj ka deklaruar, se ka debatuar me të motrën para krimit pasi i kërkonin që të linin alkoolin, pasi pretendon se Amanda ishte problematike dhe alkoolizuar prej më shumë se 10 vitesh.
“Nuk kam dashur ta vras motrën, veprova në kushtet e vetëmbrojtjes. Prej më shumë se 10 vitesh ishte e alkoolizuar dhe problematike. Mëngjesin e djeshëm kemi pasur debat pasi i kërkonim që të linte alkoolin. Fillimisht Amanda mori thikën dhe më kërcënoi mua dhe mamanë se do të na vriste. Situata u tensionua dhe veprova në kushtet e vetëmbrojtjes”, ka thënë Marsela Pushani në Polici.
Materialet i kaluan Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme procedurale.
