Kryeministri Edi Rama ka postuar në rrjetet sociale fotot e disa jahteve, të cilët janë ankoruar ditët e fundit në portin e Durrësit për t’u furnizuar me naftë, pasi e marrin me çmim të lirë, për shkak se është pa aklcizë.
Kreu i qeverisë shkruan se këtë vit në portin e Durrësit kanë ardhur 257 jahte të mëdha turistike dhe 21 kroçera dhe sipas tij pritet që ato të shtohen në vitin e ardhshëm.
“Lürssen dhe Koru nuk janë emrat e asnjë personazhi vizatimor, por superjahtet luksoze që kanë zgjedhur Durrësin për t’u ndalur në këto ditë të para të shtatorit. Sezoni ka qenë fantastik për Portin e Durrësit, me 257 jahte të mëdha turistike dhe 21 kroçera që janë mikpritur nga autoritetet shqiptare, duke qenë vetëm një shembull i vogël i flukseve të shtuara turistike, të cilat do të rriten ende më shumë falë investimeve dhe transformimeve të mëdha në infrastrukturën portuale që do të marrin jetë hap pas hapi”, shkruan Rama.
