Kryeministri britanik Rishi Sunak “pa dashje” theu kodin e sjelljes së deputetëve pasi dështoi të deklaronte interesin financiar të gruas së tij në një kompani të kujdesit për fëmijët, tha të enjten mbikëqyrësi politik i vendit.
Në lidhje me hetimin për një shkelje të mundshme të transparencës, Komisioneri Parlamentar për Standardet Daniel Greenberg tha se shkelja erdhi nga “konfuzioni” i Sunak rreth rregullave të deklarimit dhe se hetimi është mbyllur pa pasur nevojë për veprime të mëtejshme.
Hetimi u nis për këtë çështje pasi u shfaqën pretendimet se kryeministri nuk detajoi aksionet e gruas së tij në kompaninë Koru Kids, e cila do të përfitonte nga politika e qeverisë.
Ndonëse kryeministri nuk përmendi interesin financiar të familjes së tij gjatë marrjes në pyetje nga deputetët në një seancë komisioni në mars, por më pas e deklaroi atë në regjistrin e interesave ministrore.
Në një letër drejtuar komisionerit javën e kaluar, Sunak tha: “Nëse ky skenar lind përsëri, unë e kam pranuar se kam për detyrë t’i shkruaj Komitetit pas paraqitjes sime për të korrigjuar të dhënat.”
“Pranoj dhe kërkoj falje edhe një herë që letra ime drejtuar Komitetit të Ndërlidhjes më 4 Prill 2023 nuk ishte mjaft e gjerë, pasi ngatërroi gjuhën e regjistrimit dhe të deklarimit”, shtoi ai.
