Ministria e Mbrojtjes ka reaguar pasi Greqia refuzoi ndihmat e ofruara nga vendi ynë, për shuarjen e zjarreve që kanë shkaktuar edhe viktima në shtetin helen.
Nëpërmjet një njoftimi zyrtar, ministria shprehet se nga pala greke janë njoftuar se nuk kanë nevojë për ndihmë.
Me tej Ministria e Mbrojtjes sqaron se “nga pala greke jemi njoftuar se nuk është më e nevojshme ndërhyrja me modulet tokësore të ofruar nga Shqipëria për shkak se ato janë plotësuar nga vende të tjera”.
Kujtojmë që situata vijon të jetë e tensionuar mes Shqipërisë dhe Greqisë që pas arrestimit të kryetarit të zgjedhur të Himarës, Fredi Beleri. Pak ditë më parë në shtetin fqinj u mbajt edhe një darkë mes BE dhe Ballkanit Perëndimor, por kryeministri Edi Rama nuk u ftua nga Mitsotakis. Tashmë është e qartë që pas këtij refuzimi, fshihen marrëdhënie të “akullta” komunikimi mes Edi Ramës dhe homologut grek Mitsotakis.
- Reagimi i plote nga Ministia e Mbrojtjes:
“Të tronditur dhe të shqetësuar për situatën e rëndë që Greqia fqinje po përjeton nga zjarret masive, të cilat nuk kanë kursyer as jetët e njerëzve. Ngushëllimet më të sinqerta për familjet e viktimave të kësaj tragjedie!
Shqipëria, përmes Ministrisë së Mbrojtjes dhe nën koordinimin e Agjencisë Kombëtare të Mbrojtjes Civile, ka treguar gatishmërinë e menjëhershme pas kërkesës për ndihmë të dërguar nga Greqia në Mekanizmin Europian të Mbrojtjes Civile.
Një ekip me 58 efektivë dhe 10 mjete nga Forcat e Armatosura dhe strukturat e tjera operative të Sistemit të Mbrojtjes Civile Shqiptare, më konkretisht, strukturat zjarrfikëse nga Bashkia Korçë, Dropull, Maliq dhe Gjirokastër u dislokuan në afërsi të shtetit fqinj, në ndihmë të kolegëve grekë, në pritje të konfirmimit nga pala greke për ndërhyrje në zonat ku ata kanë nevojë.
Ndërkohë, pas kësaj, nga pala greke jemi njoftuar se nuk është më e nevojshme ndërhyrja me modulet tokësore të ofruar nga Shqipëria për shkak se ato janë plotësuar nga vende të tjera.
Ministria e Mbrojtjes uron që situata e rëndë në vendin mik të kalojë sa më shpejt dhe sa më lehtë dhe mbetet e anagazhuar për t’iu bërë krah miqve, partnerëve dhe fqinjëve në çdo rast kur kërcënimi bën të nevojshëm riafirmimin e parimeve që na bashkojnë”, thuhet ne njoftim.
- Kthen mbrapsht zjarrfikëset që nisi Rama
Mëngjesin e sotëm me urdhër të qeverisë janë nisur në ndihmë për shuarjen e zjarrëve që po shkrumbojnë Greqinë, disa mjete zjarrfikëse dhe punonjësë të shërbimit zjarrfikës, nga Maliqi, Korça, Gjirokastra dhe Tirana.
Punonjësit e shërbimit zjarrfikës do të angazhoheshin për emergjencat civile në zonën e Aleksandropulit, ku do të marrin pjesë në operacionet për shuarjen e zjarreve që tanimë i janë afruar qytetit dhe i kanë marrë jetën 18 emigrantëve.
Por, pasi qëndruan për disa orë në qytetin e Bilishtit dhe më pas në Pyllin e Cangonjit, zjarrfikësit shqiptarë janë kthyer mbrapsh.
Greqia refuzon ndihmën e Shqipërisë, kthen mbrapsht zjarrfikëset që nisi Rama
