Nga Boldnews.al
Shumë u morën me Ramën që tha se ka gjetur një “motër” si Meloni, kryeministre e Italisë, por askush nuk u mor me thelbin e saj vizite dhe me “dhuratën e madhe” që Rama i dha. Uji i Syrit të Kaltër, i ndodhur mes Gjirokastrës dhe Delvinës nuk do jetë më. Tubat do e përpijnë të gjithë për ta zbrazuar për bujqësinë e rajonit të Pulias në Itali. Këtë e ka konfirmuar vetë Rama, duke mos tentuar që ta mbajë të fshehtë fare, ndonëse për atë ujë ishin interesuar që nga Andreoti, Berlussconi dhe të tjerë kryeministra po as Nano dhe as Berisha nuk guxuan të bënin këtë çmenduri me kosto të madhe. Ama vjen Rama dhe nxjerr në shitje ujin që natyra na e la me miliona vite dhe ai e dhuron njësoj si ta kishte pronë të trashëguar nga familja dhe me certifikatë pronësie të lëshuar nga Kadastra e Dyshes…
“Ka kaq shumë gjëra që kemi në pritje. Së shpejti, Komiteti Strategjik për Investimet Italiane, i krijuar me Di Maio, do të mblidhet për herë të dytë. Biseduam për projektin e ujësjellësit, të cilin Andreotti dhe Berlusconi e dëshironin tashmë, nga Shqipëria në Puglia. Kjo do të ishte e rëndësishme. Bëhet fjalë për përdorimin e burimeve në Shqipërinë e Jugut për t’i lidhur ato me Italinë”-tha sot Rama për mediat italiane.
Bëhet fjalë pikërisht për ujin e “Syrit të Kaltër” madje po diskutohet edhe ai i Viroit në Gjrokastër. Asnjë protestë nuk ka për këtë marrinë të kreut të qeverisë, asnjë reagim nga banorët e zonës atje, asnjë përfaqësues i shoqërisë civile se ka zënë me gojë, e aq më pak ndonjë ambientalist që edhe pas këtij lajmi që tashmë është zyrtar dhe fakt i kryer nuk denjon të thotë një fjalë kundërshtie.
“Qeveria shqiptare na ka autorizuar të fillojmë projektimin e ujësjellësit që do të lidhë Shqipërinë me Italinë. Shqipëria hedh një sasi të madhe uji të mirë në det dhe padyshim ka interes të paguhet për ujin. Ne kemi interes ta marrim sepse për ne uji do të thotë t’i japim një model të ri bujqësisë, të bëjmë turizmin të rritet dhe t’u japim një të ardhme të gjithë pulianëve,”– deklaroi presidenti i rajonit të Pulias, Michele Emiliano, gjatë një konference për shtyp në Bari rreth një vit më parë.
Për të ndërtuar infrastrukturën do të duheshin 4 vjet punë dhe një miliard burime financimi nga BEI, BERZH, shteti italian, rajoni etj. Qëllimi është që çdo vit të transportohen 150 milionë metër kub ujë në Pulia. Pronën shtetërore, që është e të gjithëve si pasuri, Rama ja ka hequr “shtëpisë Shqipëri” dhe ia dha komshies…
Të gjithë merren si ishte veshur Rama dhe Meloni, kush pagoi kafet dhe sa selfie bënë me turistë italianë apo vlonjatë që kalonin aty pranë tyre. Kryeministri ka arritur në atë pikë sa bën rolin e xhymertit me pronën publike, atë që nuk guxuan ta bënin as Berisha dhe as Nano, pavarësisht kërkesës së vazhdueshme të kryeministrave italianë.
Syrin e Kaltër tashmë mbajeni si kujtim vetëm në foto ose video, pasi shumë shpejt nuk do të jetë më, duke shërbyer për bujqësinë e rajonit të Puglias. Rama e dhuroi. Meloni mori këtë dhuratë kaq të çmuar pasi qëndroi katër ditë me pushime në Vlorë dhe I ofroi kryeministrit tonë vetëm propagandën, e cila për të është ushqimi dhe uji që e mban gjallë!
