Kreu i PD-së së vulës, Lulzim Basha ka reaguar në lidhje me 8 urdhër-arrestet e lëshuara nga prokurorët e SPAK, Ened Nakuçi dhe Edvin Kondili, për koncesionin e sterilizim, ku masa “arrest me burg” ishte vetëm për ish-zëvendësministrin e Shëndetësisë, Klodian Rrjepaj, si dhe biznesmenin që ka fituar koncesionin Ilir Rrapaj, ndërsa për 6 zyrtarë të tjerë është vendosur “detyrim paraqitje” dhe “arrest shtëpie”.
Në një postim në rrjetet sociale, Basha shkruan se koncesionet në shëndetësi janë vepra korruptive të qeverisë Rama, ku sipas tij, për vite me radhë paratë e shqiptarëve nuk janë vendosur në shërbim të pacientëve, por të politikanëve të korruptuar dhe klientëve të tyre.
Teksa përshëndet veprimet heimore të SPAK, Basha i bën thirrje institucionit të drejtësisë për të hetuar në thellësi, duke shkuar deri tek burimi i kësaj skeme korruptive dhe rrënuese për interesin publik dhe t’i shkojnë deri në fund zinxhirit të përgjegjësive.
“Koncesionet në shëndetësi janë vepra korruptive të qeverisë Rama, të cilat janë denoncuar publikisht dhe janë kallëzuar penalisht në SPAK nga Partia Demokratike. Për vite me radhë paratë e shqiptarëve nuk janë vendosur në shërbim të pacientëve, por të politikanëve të korruptuar dhe klientëve të tyre. Kjo lojë e paskrupullt me shëndetin e njerëzve, është dëshmi e makutërisë primitive të kësaj qeverie, e cila duhet hetuar në thellësi, duke shkuar deri tek burimi i kësaj skeme korruptive dhe rrënuese për interesin publik, e cila nuk u ndal as gjatë kohës së vështirë të pandemisë. Përshëndes veprimet hetimore të SPAK dhe e inkurajoj t’i shkojnë deri në fund zinxhirit të përgjegjësive që kanë shkaktuar dëme të parikuperueshme për qytetarët shqiptarë, të cilët presin dhe meritojnë drejtësi!” shkruan Basha.
