Njerëzit pranë pushtetit vijojnë të rrahin, masakrojnë dhe vrasin. Në pak kohë, një seri ngjarjesh kriminale kanë zbuluar mizorinë e personave krahët e të cilëve janë të ‘ngrohur’ nga pushteti.
Bujë bëri akti mizor i Rrajave të Fushë-Krujës, ku një djali i një deputeti me shko bejsbolli në dorë, bashkë me xhaxhanë e armatosur me pistoletë dhe anëtarë të tjerë të fisit, dhunuan brutalisht dy kushërinj të cilin ishin ankuar se veprimtaria shpërthyese e gurores së një prej Rrajave po u shembte shtëpitë.
Më tej, një hetim i autoriteteve franceze zbuloi sesi një biznesmen i shpallur investitor strategjik nga enti shtetëror i drejtuar nga kryeministri Edi Rama, porositi vrasjen e një personi me të cilin kishte pasur një konflikt disa vite më parë.
Këtë të Hënë, një tjetër i rrethit të ‘ngrohurve nga pushteti’ u bë protagonist i një ngjarje kriminale. 55-vjeçari Armando Meshau u përfshi në një konflikt fizik në Vlorës me 33-vjeçarin Rei Meta. Ngjarja ndodhi rreth orës 11:45, në një qendër interneti, në lagjen “Hajro Çakërri”. Si pasojë e “goditjeve me grushte nga Rei Meta”, konfirmoi policia, inxhinieri Armando Meshau humbi jetën.
Konflikti dyshohet se ka lidhje me një borxh të pashlyer për një apartament, ndërsa autori u arrestua disa orë pas ngjarjes.
Në pranga u vu 33-vjeçari Rei Meta, i cili është djali i Nurihan Meta (Seiti), anëtares së Këshillit të Lartë të Prokurorisë.
Nurihan Seiti ka qenë prokurore në sistemin komunist, ndërsa në “drejtësinë e re” ka një karrige në qeverinë e prokurorëve. Po ashtu, referuar deklarateve të pasurisë dorëzuar në ILDKPKI, bashkë me bashkëshortin (edhe ai zyrtar i regjimit) rezultojnë pronarë të pasurive të paluajtshme, vlera e të cilave përllogaritet në mbi 250 milionë lekë të vjetra.
