Enrik Ismalaj, 23 vjeç, banues në Tiranë, u arrestua këtë të hënë nga policia e kryeqytetit në tentativë e sipër për të vjedhur filialin e një banke në Unazën e Madhe.
Pas marrjes së njoftimit, efektivët e policisë kanë ndërhyrë në bankën e ndodhur në rrugën “Teodor Keko”, duke bërë të mundur arrestimin në flagrancë të autorit të dyshuar.
23-vjeçari tashmë duhet të përballet me akuzat për dy vepra penale “Vjedhja e bankave dhe arkave të kursimit”, mbetur në tentativë, dhe “Shkatërrimi i pronës”.
“Si rezultat i punës së mirëorganizuar është kapur në flagrancë nga shërbimet e Policisë, në rrugën “Teodor Keko”, shtetasi E. I., në tentativë për të vjedhur në një filial banke”, njofton policia.
Materialet i kaluan Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme procedurale.
