Një kualifikim i lehtë, por me probleme serioze sa i përket interpretimit të lojës. E ka shumë të qartë trajneri i Partizanit, Zoran Zekic, se duhet të ndërhyjë për të rregulluar shumë gjëra taktikisht.
“Mund të them se kishim shumë shanse, por nuk shënuam shumë. Megjithatë, kishim shumë, shumë probleme taktikisht, ndërrova sistem pas 5 minutash. Ishin shumë të hapur, skuadra kundërshtare nuk la hapësira. Mund të jem i lumtur për rezultatin, por nuk do të fle sot se duhet të punoj shumë e mendoj si të përmirësohemi për ndeshjen tjetër. Sinqerisht, nuk mund të luajmë kështu në Europë.”
Valmiera, kundërshtarja e radhës: “Nuk e kam parë Valmierën, por di që ka luajtur kundër Olimpija Ljubljanës dhe është ekip serioz. Kam miq atje dhe do të pyes. Duhet të jemi më kompaktë e me disiplinë.”
Ndryshimet: “E pashë pas 5 minutash që kishim shumë probleme. Duhej të kishim një lojtar më shumë në mes të fushës. Vendosa Rrapajn të mbështeste Hadrojin dhe pastaj numrin 6 që të mbështeste këtë linjë. Nuk ishim të përgatitur për topin e gjatë. Ne humbëm Mensah, një ditë më parë Maget. Nëse dhurojë të njëjtën përformancë si ndaj BATE, mendoj se kemi më shumë shanse për kualifikim. Ne kemi shanse të mira, por duhet të kemi energji, të luajmë më mirë.”
