Vala e të nxehtit Cleon është këtu dhe hidratimi i mirë është arma më e mirë kundër temperaturave të larta. Kushtet ekstreme të motit kërkojnë marrjen e masave të nevojshme mbrojtëse dhe ndër masat e nevojshme është konsumimi i sasisë së duhur të ujit, veçanërisht nga personat që i përkasin grupeve vulnerabël.
Dehidratimi mund të shkaktojë dhimbje koke ose marramendje, të cilat më vonë mund të çojnë në probleme të tjera më serioze shëndetësore, si goditje nga nxehtësia. Megjithatë, një pyetje e rëndësishme është se sa ujë duhet të pimë gjatë një vale të nxehtë. Përveç shmangies së pijeve me sheqer apo kafeinë, reduktimit të aktivitetit fizik, qëndrimit sa më gjatë në vende të freskëta, ngrënies së vakteve të lehta dhe sigurisht shmangies së ekspozimit ndaj diellit të nxehtë, uji duhet të jetë gjithmonë me ju.
Sipas ekspertëve, sasia që duhet të konsumoni gjatë periudhave të temperaturave ekstreme ndryshon nga personi në person. Për shembull, sasia adekuate për meshkujt e rritur, sipas rekomandimeve, është të paktën 2.5 litra në ditë. Varësisht nga pesha ndryshon edhe sasia e saktë e ujit që duhet konsumuar, ndaj për foshnjat dhe fëmijët rekomandimi është më i vogël.
Gratë shtatzëna ose ato me gji duhet gjithashtu të kenë kujdes të veçantë dhe të qëndrojnë gjithmonë të hidratuara. Madje rekomandohet që të rrisin sasinë e konsumit mbi kufirin që konsiderohet se duhet të pinë të rriturit. Megjithatë, është e rëndësishme të dini se konsumimi i sasive shumë të larta mund të shkaktojë humbje të natriumit dhe kaliumit.
Në përgjithësi, ka shumë kërkime që tregojnë se dehidratimi i lehtë (1-3% e peshës trupore) i shkaktuar nga stërvitja ose nxehtësia mund të ndikojë negativisht në shumë aspekte të funksionit të trurit. Megjithatë, është e rëndësishme të mbani në mend se vetëm 1% e peshës trupore është në fakt një sasi mjaft e konsiderueshme. Kjo ndodh kryesisht kur jeni duke djersitur vazhdimisht, si gjatë stërvitjes ose në temperaturë të lartë. Ky dehidrim i lehtë gjithashtu mund të ndikojë negativisht në performancën fizike, duke çuar në ulje të qëndrueshmërisë.
Pavarësisht nga stina, besimi se duhet të pini 8 gota të larta ujë në ditë është një mit. Ajo që ju nevojitet vërtet janë lëngjet e mjaftueshme për të zëvendësuar atë që humbni çdo ditë përmes djersës, urinës, frymëmarrjes dhe sekrecioneve të tjera trupore. Kjo është rreth 8 deri në 10 gota ujë. Por duhet të dini se uji nuk është e vetmja gjë që kontribuon në ekuilibrin e lëngjeve, por edhe pijet dhe ushqimi mund të kenë një efekt të rëndësishëm.
