Janë identifikuar viktimat e aksidentit tragjik të regjistruar pasditen e djeshme në Greqi, ku fatkeqësisht humbën jetën pesë shqiptarë. Mes viktimave është dhe një i mitur 16 vjeç, si dhe një 19 vjeçar.
Më konkretisht, mediat fqinje raportojnë se ka ndërruar jetë shoferi Besim Muçaj, 55 vjeç, nga Durrësi; Ilir Daci, 50-vjeç; Ergin Peposhi, 19 vjeç; Ardit Peposhi, 16-vjeç dhe Gazment Brahaj, 47-vjeç.
Aksidenti u regjistrua rreth orës 18:00 të së martës në unazën e Edesës. Mjeti tip “Mercedec Benz”me targa shqiptare “AA 989 MU” me të cilin po udhëtonin pesë viktimat u përplas “kokë më kokë” me një kamion. Sipas mediave greke, “Benz-i” ka dalë nga korsia e vetë në rrethana ende të pazbardhura dhe ka hyrë në korsinë e gabuar, duke u përplasur më pas me kamionin.
Siç shihet dhe në fotot e mëposhtme, përplasja ka qenë aq e fortë sa e vetmja pjesë e makinës që ka mbetur e paprekur ka qenë bagazhi.
Të gjithë personat që ndodheshin në mjet gjetën vdekjen në vendin e ngjarjes. Për nxjerrjen e trupave të tyre u desh ndërhyrja e forcave zjarrfikëse, ndërsa policia në vendngjarje nisi hetimet për zbardhjen e rrethanave të këtij aksidenti.
Sipas medias greke ‘Protothema’, pesë shqiptarët që ndërruan jetë ishin punëtor ferme dhe po shkonin drejt Malit të Zi.
