Gjatë ditës së sotme policia ka asgjësuar një tjetër parcelë me kanabis në Krujë.
Uniformat blu bëjnë me dije se janë sekuestruar 875 kanabisi që u gjetën të kultivuara në terren malor, në një fshat të Krujës.
Njësoj si operacionet e tjera policia ka dështuar për të vendosur para drejtësisë pronarët e kësaj sere me kanabis.
“Finalizohet nga Komisariati i Policisë Krujë, faza e 28-të e mega-operacionit policor anti-kanabis të koduar “Territor i pastër”. Gjatë kësaj faze u asgjësuan nëpërmjet djegies 875 bimë narkotike cannabis sativa që u gjetën të kultivuara në terren malor, në një fshat të Krujës.
Shërbimet e Komisariatit të Policisë Krujë kanë vijuar kontrollet në zonat malore të Krujës, duke përdorur dhe dronë, me qëllim parandalimin, evidentimin dhe goditjen e veprimtarisë kriminale të kultivimit të bimëve narkotike.
Nga këto kontrolle, gjatë fazës së 28-të të megaoperacionit “Territor i pastër”, në fshatin Cudhi Kamp, në Krujë, u gjetën të kultivuara 875 bimë të dyshuara narkotike cannabis sativa, të cilat u asgjësuan me anë të djegies.
Strukturat hetimore, në bashkëpunim me Prokurorinë, vijojnë punën për identifikimin dhe kapjen e autorëve të kultivimit të bimëve narkotike. Operacioni i kontrollit të territorit vijon”, njofton policia.
