Nga Artur Meçollari
Në datën 9 nëntor 2020 në orën 17:45, në zyrën e KM Edi Rama hyri Ambasadorja e SHBA në Tiranë Znj. Yuri Kim. Ajo pati një takim për gati 30 minuta me KM Rama. Mbas takimit Znj. Kim shkroi në Facebook.
“Sot patëm një diskutim të shkëlqyeshëm me Kryeministrin Edi Rama për të rishikuar progresin e fundit në marrëdhëniet Amerikë-Shqipëri dhe për të diskutuar mënyrat për të ecur përpara në bashkëpunimin tonë në Demokraci, Mbrojtje dhe Biznes. Shumë mundësi (por edhe punë e vështirë!) Përpara për partneritetin tonë!”
Takimi nuk ishte një bisedë normale. Znj. Kim i deklaroi Z. Rama korrupsionin e lartë në Ministrinë e Mbrojtjes, duke i prezantuar të paktën gjashtë raste korruptive. Një nga rastet e prezantuara nga Znj.Kim ishte dhënia me qera 1 Euro për 20 vjet të bazës detare të Sarandës. Znj. Kim ishte e qartë në takim. Historia e bazës detare të Sarandës është një histori korruptive dhe Qeveris duhet të heqi dorë. KM Rama i tha znj. Kim se do ti shikonte këto çështje, pasi sipas tij nuk kishte informacion nga brenda sistemit. Takimi u bë pa prezencën e Ministrit të Mbrojtjes Znj. Olta Xhaçka.
Për ta bërë më të besushme se KM Rama nuk kishte dijeni, për një nga çështjet e ngritura nga Znj. Kim, Drejtoresha e Kabinetit të KM znj. Vali Bizhga therret në një takim në Kryeministri Z. Bahri Shaqiri, Këshilltar për Sigurinë Kombëtare të Presidentit Meta dhe e pyet se ka një interes nga Ambasadorja Kim si e ka firmosur Presidenti emërimin e një gjenerali në papërputhshmëri me detyrën. Z. Bahri i përgjigjet se për këtë ka një propozim nga Ministria i Mbrojtjes, Znj. Olta Xhaçka.
Në datën 4 prill 2021, KM Rama do të promovonte në Facebukun e tij projektim Marina Bay Saranda, kompani të cilës KM i ka dhënë 265.000 m² për 20 vjet, duke përfshirë edhe bazën detare të Sarandës prej 40.000 m². Sot në SPAK, nuk është nën hetim vetëm kontrata mbi bazën detare të Sarandës, por janë bërë në total gjashtë çështje, ku janë përfshirë në hetim një president, një ministër, një deputet dhe shumë zyrtarë të lartë.
Rama dhe pse ka patur dijen, të paktën më 9 nëntor 2020, asnjëherë nuk ka nisur një hetim administrativ apo kallëzim penal për dhënien me qera të bazës detare të Sarandës, apo shpërdorimet e detyrës së nënpunësve publik për çështjet e tjera. Përkundrazi ata që janë përfshirë në historitë korruptive me pronat e Forcës Detare janë promovuar në grada dhe detyra.
Zoti Rama prej shumë kohës nuk prononcohet më për projektet turistike në pronat e Forcës Detare me qëllim që nesër të deklaroi se edhe për këto çështje “vartësit i kanë ngrënë kumblla dhe dardha mbas shpinës”. Unë e kamë vënë në dijeni Z. Rama përpara dhe mbas takimit me Ambasadoren Kim. Pra, Z. Rama është në dijeni, të paktën nga Ambasadorja Kim qysh prej datës 9 nëntor 2020.
Sot çështjet në hetim nga SPAK, në dosjet hetimore 198/2021 dhe 109/2021 vetëm për pronat e Forcës Detare janë gjashtë çështje:
1) Procedura e lidhjes së kontratës më 15 korrik 2020 për dhënien me qera 1 Euro për 20 vjet të Bazës Detare Sarandë kompanisë “Marina Bay Sarsnda”, si bashkim i operatorëve ekonomik Kastrati Group dhe Concord Investment:
2) Procedura e lidhjes së kontratës konçesionale më 23 qershor 2020 për portin turistik të Limionit për 35 vjet me kompaninë “Marina Limion” si bashkim i operatorëve Kastrati Group dhe Edil-Al-It.
3) Dorëzimin e bazës Detare të Sarandës në shkurt 2022 firmës Marina Bay Saranda. Për këtë SPAK në mars 2023 ka vendosur sekuestro preventive mbi bazën Detare të Sarandës me argumentin se zotërimi i lirë i pronës nga privati ka cënuar gadishmërinë operacionale të Forcës Detare dhe ia ka kthyer pronën po Forcës Detare që e ka dorëzuar vetë.
4) Lejimin dhe zaprimin e pronës nr. 219 “Ish-Depua e minave” Porto Romano me sipërfaqe 5,2 hektar prej tetorit 2021 nga operatori Porto MBM, pjese e Kastrati Group.
5) Lejimi i ndërtimit të një godine 4-katëshe midis nentorit 2020 dhe marsit 2021 në Bazën Detare të Shëngjinit.
6) Shkelje të ligjit, pa miratim të Presidentit, për nxjerrjen nga plani i përhapjes dhe vendosjes së Forcës Detare të 133 hektar nga 200 hektar të provave në katër baza detare: Shëngjin, Kepi i Palit, Pashaliman dhe Palermo.
