Drejtuesja e Kuvendit, Lindita Nikolla nuk pranoi një kërkesë të kreut të grupit parlamentar të PD-së në parlament Gazment Bardhi, për Arben Ahmetajn. Ky i fundit kërkoi që Kuvendi të hidhte në votim në seancën e sotme kërkesën e SPAK për arrestimin e ish-ministrit të Financave Arben Ahmetaj, i hetuar fillimisht për aferën e inceneratorëve.
Megjithatë, Nikolla nuk pranoi kërkesën me të cilën shprehën kundërshti dhe socialistët.
Deputetja e PS-së, Klotilda Bushka tha se kërkesa e Bardhit s’ka bazament ligjor dhe është më tepër në interesin politik të ditës dhe jo drejtësisë.
Në komentin e saj u përqendrua te procedura, duke u shprehur se më parë duhet një raport nga Këshilli i Mandateve lidhur me kërkesën e prokurorisë për Ahmetajt, që aktualisht nuk është në parlament.
Sipas saj, neni 118 i rregullores së parlamentit thotë që brenda dy javësh të hartohet një raport lidhur me kërkesën e SPAK. “Ne kemi mbaruar dje shpjegimin (i referohet seancës në Këshillin e Mandateve). Kemi rënë dakord për miratimin e kërkesën. Kemi njoftuar që raporti dorëzohet nesër dhe të hënën është seanca”, tha ajo.
Ajo përmendi dhe pikën që parashikon se në seancë plenare ku votohet raporti i Këshillit të Mandateve, “fjala i jepet në fillim deputetit ndaj të cilit është paraqitur kërkesa për të dhënë shpjegime ose për t’iu përgjigjur pyetjeve të deputetëve”.
“Pika 4 nënkupton që ka një garanci porceduriale si e drejta për tu dëgjuar, për të respektuar shtetin e së drejtës. Përndryshe procesi mund të ketë cënim dhe është interesi i drejtësisë. Ju këroni që procesi të jetë me cen? A kemi thënë të respektojmë drejtësinë? Drejtësia është ta ndihmosh me vepra jo me fjalë. Duhet të zbatojmë procedurën, përndryshe e dëmtojmë procesin”, shtoi Bushka.
Gazment Bardhi kërkoi po ashtu prezencën e Ramës në seancës për të dhënë llogari lidhur me çështjen Ahmetaj dhe atë të dhunës së familjarëve të ish-deputetit të PS-së Rahman Rraja në Fushë-Krujë.
“S’mund ta kalojë në heshtje duke pretenduar që po zgjidh hallet e gjithë botës, ndërkohë që s;ka zgjidhur hallet e korrupsionit të tij. Është gjithë qeveria e përfshirë në këtë aferë”, tha Bardhi duke iu referuar inceneratorëve.
Nikolla ndërkohë tha se një interpelancë me kryeministrin duhet të miratohet fillimisht në Konferencën e Kryetarëve. Megjithatë, deputetja Ina Zhupa sqaroi se kërkesa nuk ishte për intepelancë, por për prezencën e Ramës në parlament.
“Kërkuam prezencë jo interpelancë. Rama s’vjen sepse deklaratat e tij mund të përdoren kudnër tij, sepse ka deklaruar që i ka të dyja duart brenda në aferën e incenratorëve”, tha Zhupa.
Mosprezencën e Ramës në parlament e dënuan dhe ligjvënësit e tjerë demokratë.
Nga radhët e socialistëve, fjalën e mori edhe Elisa Spiropali, ministrja e Shtetit për Marrëdhëniet me Parlamentin. “Nëse ka një çështje që s’na kompleksoni është raporti ynë me drejtësinë”, tha Spiropali, duke iu përgjigjur akuzave të opozitës për korrupsionin në radhët e qeverisë.
