Është zbardhur qëndrimi që kanë mbajtur avokatët e Arben Ahmetajt, Ardian Visha dhe Henrik Ligori në mbledhjen e Këshillit të Mandateve dhe Imunitetit për mbrotjtjen ndaj akuzave të SPAK, për kërkesën për arrestimin e ish-zv.kryeministrit.
Sipas avokat, SPAK nuk e thotë se “cili është veprimi apo mosveprimi kriminal i Ahmetaj në cilësinë e ministrit përkatës, cila është pasoja kriminale e ardhur, në ç’masë e kanë determinuar këtë pasojë veprimet e ish-ministrit, çfarë pushteti vendimmarrës i lejonte atij ligji për këto procedura, cilat janë këto 6 raste korruptive, janë të veçuara nga njëra-tjetra apo pjesë e një krimi permanent (mendim unik kriminal), sa para ka përfituar ai për secilin episod korruptiv, etj., etj.”
Pra mbrojtja konteston faktet penale të korrupsionit që i atribuohen deputetit dhe kërkon sqarime konkrete rreth veprave kriminale dhe lidhjeve të tij me procedurat për inceneratorët.
Ata theksojnë se hetuesit kanë kaluar në sferën e jetës private dhe financiare të ish-ministrit, duke filluar hetimin e personit në vend të faktit penal. Po ashtu avokatët kundërshtojnë qëndrimin e prokurorisë për procedurën e negociimit dhe moskonsiderimin e çështjeve teknike në propozimet e shoqërive.
Ndër të tjera, kanë deklaruar dhe se Ahmetaj nuk e ka mohuar kurrë, se ka pasur njohje të afërt, të paktën prej vitit 2011 me Mirel Mërtirin, një personazh kyç në këtë çështje.
