Një 47-vjeçar është arrestuar nga policia e Fierit për veprën penale “Prodhimi dhe shitja e narkotikëve”.
Në pranga u vu Anil Canka, 47 vjeç, pas një hetimi disamujor me metoda proaktive, njoftoi policia këtë të mërkurë.
Efektivët kanë sekuestruar rreth 1000 doza me lëndë të dyshuar narkotike kanabis, që u gjetën në automjetin dhe në banesën e 47-vjeçarit.
“Ky shtetas është ndaluar nga shërbimet e Policisë, në vendin e quajtur ‘Pushimi i shoferit’, ndërkohë që po udhëtonte me automjetin e tij, në të cilin, gjatë kontrollit, u gjet një sasi lënde e dyshuar narkotike kanabis, e ndarë në qindra doza, gati për shitje. Në vijim të veprimeve, gjatë kontrollit në banesën e këtij shtetasi, u gjetën edhe qindra doza të tjera me lëndë të dyshuar narkotike kanabis. Në cilësinë e provës materiale u sekuestruan dozat e lëndës narkotike, një peshore elektronike që shërbente për ndarjen e lëndës narkotike në doza, 7 aparate celulare dhe automjeti tip ‘Volkswagen’”, njoftoi policia.
Nga veprimet hetimore dyshohet se 47-vjeçari e ushtronte aktivitetin e tij kriminal në Lushnjë dhe në fshatrat e Divjakës, ndërsa vijojnë veprimet hetimore për dokumentimin e plotë të veprimtarisë kriminale të këtij shtetasi, shtuan të njëjtat burime.
