Kryetari i Partisë Demokratike, Sali Berisha është shprehur se ka përfunduar raporti, që sipas tij, fakton se zgjedhjet e 14 majit ishin të manipuluara.
Gjatë konferencës së përjavshme me gazetarë këtë të Premte nga selia blu, Berisha konfirmoi se “raporti për farsën elektorale është i përfunduar”.
Në fillim të javës që vjen, shtoi ai, “do paraqitet para jush dhe opinionit publik shqiptar”.
Ndërkohë, vijoi, “është paraqitur dhe vazhdon të paraqitet para opinionit publik ndërkombëtar”.
“Ky raport, i bazuar në qindra dhe mijëra fakte, dëshmon se me 14 maj u zhvillua farsa më e turpshme elektorale pas diktaturës komuniste në Shqipëri dhe Europë. Ky raport dëshmon se zgjedhjet e vitit 2023 ishin një proces totalisht i kontrolluar nga qeveria, një proces në të cilin shqiptarët votuan në një presion si kurrë më parë në 32 vite. Ndaj, duke qenë në përfundim të këtij raporti, u informoj se ai do paraqitet para jush si një ekspoze tërësore. Pastaj ka një projekt që do paraqitet qark pas qarku, të gjitha problematikat e mëdha. Qëllimi është një dhe vetëm një, ndërgjegjësimi në respekt të votës së lirë, i qytetarëve shqiptarë për atë që ndodhi me votën e tyre”, theksoi kryedemokrati.
Vetëkuptohet se rezultate false, tha Berisha, PD nuk do njohë kurrë.
Kryedemokrati deklaroi se opozita është përballë një farse elektorale dhe në këto kushte “po përgatitet për betejë”.
Ai foli edhe për ndryshimet e kërkuara nga disa parti të vogla në Kodin Zgjedhor. “Opozita ka për mision rikthimin e të drejtës së votës për shqiptarët. Opozita ka qenë, është dhe mbetet e betuar për sistem parlamentar në Shqipëri. Ky njeri që po flet këtu, në vitin 1992 ka pasur kompetenca ekzekutive dhe është shprehur që në atë kohë kundër dhe është gjithnjë kundër. Kurrë opozita nuk mund të marrë pjesë në një akt të tillë. Sa i përket ndryshimeve në kodin elektoral, jam shprehur dhe shprehem se jam plotësisht dakord me vendosjen e nenit për votimin e detyruar të qytetarëve. E kanë disa vende të lira dhe ato që e kanë vendosur, kanë pasur vetëm mirësi nga kjo, sepse ka shmangur blerjen e të drejtës së votës. E kanë vendosur demokraci të konsoliduara me shumë sukses si Australia vetëm për këtë arsye. Edhe atje bëhej kërdia me blerjen e votës nga oligarkët. Jam dakord plotësisht dhe e kam ngritur para disa vitesh uljen e moshës për të drejtën e votimit në 16 vjeç. Kam bërë fushatë për këtë në vitin 2013. Jam i hapur plotësisht për proporcional të pastër, për lista të hapura. Proporcionali i pastër nuk mund të injorohet. Ka që tani disa inkonvenienca se rrezikon të pasurit dhe të fortët të fitojnë, por kjo është e drejtë”, tha ai.
