Një histori e pazakontë vjen nga Kukësi. Polici ka zbuluar se një 57-vjeçar, 21 vite më parë, në moshën 36-vjeçare, ka arritur të regjistrojë si vajzën e tij, një fëmijë që nuk ekzistonte. Fëmijën e pretenduar që askush nuk e kishte sjellë në jetë, por që e regjistroi në certifikatë familjare si të tijën, në vitin 2021, burri e shpalli të vdekur, dhe e çregjistroi nga gjendja civile.
Policisë së Kukësit iu desh disa muaj të hetojë me metoda speciale, për të zbuluar se Xh. Sopaj kishte falsifikuar ndër vite dokumentet, me qëllimin që të përfitonte ndihmë më të madhe nga shtetit.
Një mjek dhe administratori i një agjencie funerale janë nën hetim për shpërdorim të detyrës.
Sopaj “krijoi” vajzën imagjinare në vitin 2002, kur ndërkohë bashkëshortja e tij kishte sjellë në jetë 2 fëmijë në 1998-ën dhe në vitin 2000. Për të përfituar pension më të lartë ndihme nga shteti, sipas ligjit të kohës, familja duhej të kishte 3 fëmijë.
“Nga veprimet hetimore rezulton se 57-vjeçari e ka kryer këtë veprimtari kriminale, për të përfituar pension më të lartë, bazuar në ligjin e kohës”, njofton policia.
Por në 2004-ën dhe 2007-ën zoti e bekoi këtë familje me 2 fëmijë të tjerë, kështu që Xh. Sopaj duke mos ndjerë më përfitime nga vajza imagjinare, e shpalli të vdekur, për të fshirë çdo gjurmë të saj nga certifikata familjare.
Hetuesit kanë dyshime se në gjithë këtë veprimtari kriminale, 57-vjeçari të mos ketë qenë i vetëm. Ndaj po hetojnë për shpërdorim detyre, një mjek që mund të ketë lëshuar certifikatë false lindjeje, dhe administratorin e një agjencie funerale, që mund të ketë bërë certifikatën false të vdekjes.
57-vjeçari nga Kukësi do të hetohet nga Prokuroria për 2 vepra penale “mashtrimi” dhe “falsifikimi i vulave dhe stampave dhe formularëve”.
