Artan (Marius) Tafani, 39 vjeç, është identifikuar nga hetuesit si personi që kreu grabitjen me armë të një pike të këmbimit valutor në zonën e Astrit në Tiranë, më 24 Qershor.
Ai është shpallur në kërkim nga policia që ka arrestuar një tjetër person: Enio Meçaj 35 vjeç, i akuzuar se ka ndihmuar Tafanin pas grabitjes.
“Gjatë veprimeve hetimore ka rezultuar se shtetasi Artan (Marius) Tafani, banues në Tiranë, më datë 24.06.2023 në Unazë të Re, është futur në një pikë për transferta parash dhe këmbimi valutor dhe nën kërcënimin e një arme zjarri pistoletë ka marrë një shumë parash është larguar me një biçikletë”, njoftoi policia.
“Shtetasi Enio Meçaj, banues në Fier, i ka vënë në dispozicion autorit të dyshuar një garazh automjetesh, dhe me veprimet dhe mosveprimet e tij ka penguar zbulimin e së vërtetës, duke pretenduar se nuk e njeh personin që ka në posedim garazhin. Gjatë kontrollit të garazhit u gjetën biçikleta dhe veshjet e përdorura nga autori gjatë ngjarjes, si dhe një automjet që rezulton i vjedhur me datë 23.02.2023, në Shijak, Durrës”, shtuan të njëjtat burime.
Autori Artan Tafani i cili rezulton i dënuar edhe më herët për grabitje dyshohet se ka marrë të paktën 30 mijë euro. Hetuesit po verifikojnë nëse ndonjë nga punonjëset mund të ketë bashkëpunuar me të fshehtazi.
