Kryetari i Partisë së Lirisë, Ilir Meta, i ka bërë thirrje qeverisë që të tërhiqet sa më parë nga prjektligji për legalizimin e kanabisit mjekësor.
Në një deklaratë për mediat, Meta deklaroi se projektligji për legalizimin e kanabisit do i hapte rrugë narkotrafikut pa fre e kontroll. Sipas tij, situata është më e rëndë në momentin që BE thotë se Shqipëria nuk është konsultuar me ta për këtë ligj. Meta thotë se mënyra më e mirë për të ndalur këtë murtajë që ka pllakosur vendin është kthimi pas i këtij ligji.
“Projektligji është legalizimi defacto i drogës në Shqipëri. Akoma më e rëndë është situata kur BE thotë se Shqipëria nuk është konsultuar me ta për ligjin për legalizimin e kanabisit. Alibia e përfitimit ekonomik bie, pasi përfitimet janë thuajse zero, siç u provua edhe në Maqedoninë e Veriut.
Ky ligj ka pasoja shkatërimtare për të rinjtë shqiptarë, sepse krijon varësi Kanabisi është një drogë që çon në përdorimin e drogërave më të forta. DASH ka qenë shumë i qartë në raportin mbi kanabisin shqiptar. Shqipëria thotë raporti cilësohet si një rrugë kyç e trafikut të drogës drejt Europës Perëndimore dhe Amerikës. Kanabisi shqiptar dërgohet në Turqi dhe këmbehet me kokainë dhe heroinë që shpërndahen në Europë. Pra është shumë e qartë, që legalizimi i drogës nga qeveria e Ramës, është vetë legalizimi i narkoshtetit, që blen zgjedhjet dhe shpopullon Shqipërinë dhe i hap narkotrafikut rrugë për ta shndërruar vendin në bazën më të madhe të trafikut në Europë. Tërheqja dhe kthimi mbrapsht i këtij ligji, është e vetmja rrugë për të ndalur këtë murtajë që ka pllakosur vendin.” – deklaroi Meta.
