Prokurorja e Vlorës, Vitjuna Mata u konfirmua në detyrë këtë të martë nga Komisioni i Pavarur të Kualifikimit,
Vendimi u mor nga një trupë e kryesuar nga Xhensila Pine, me relator Olsi Komicin dhe anëtare Firdes Shulin. Në cilësinë e vëzhgueses ndërkombëtare ishte e pranishme Maria Tuma.
Gjatë seancës dëgjimore, prokurorja u përball me barra prove që më së shumti kishin të bënin me të ardhurat dhe pasuritë e bashkëshortit përpara martesës. Ajo kërkoi që bazuar në parimin e proporcionalitetit, bashkëshorti të mos konsiderohej si person i lidhur duke theksuar se ishin pasuri vetjake të tij. Matës nuk iu konstatuan probleme të figurës apo profesionalizmit.
Vitjuna Mata përfundoi studimet në Shkollën e Magjistraturës në vitin 2016 dhe u emërua si prokurore në Prokurorinë e Vlorës. Në janar të vitit 2022 ajo u komandua pranë Këshillit të Lartë të Prokurorisë.
