Duket se projekti i sterilizimit të qenëve në këmbim të marrëdhënieve seksuale, nuk është afera e vetme korruptive e ish-kryebashkiakut të Kukësit, Safet Gjicit.
Kjo kuptohet nga fakti se ai kishte urdhëruar stafin që askush të mos futej në zyrën e tij, me çanta apo pajisje të tjera, pasi i druhej një filmimi apo përgjime, ndoshta kur fliste për tendera, punësime pa meritë apo diçka tjetër që bie në kundërshtim me ligjin.
Por, duket se 40-vjeçarja Alma K., i shpëtoi kësaj gjëja dhe siç duket për t’u bërë më e besueshme ajo kishte lënë edhe telefonin në makinë.
Gjithsesi, duket se Gjici ka dyshuar se Alma mund t’i kishte bërë ndonjë filmim, pasi tek video, në momentin kur 40-vjeçarja largohet nga zyra e tij, ish-kryebashkiaku dëgjohet t’i thotë: “kështu nëpër zyra me këtë (çantë) në dorë…”.
“Hë se e heq, se rrugë e gjatë” i justifikohet me të qeshur Alma, siç duket për ndonjë shishe uji që mund të mbante në të.
Kujtojmë se ishte pikërisht çanta e cila “fundosi” Gjicin, pasi tek ajo ishte vendosur pajisja, e cila filmoi gjithçka, si aktin seksual, por edhe bisedën më pas për projektin e sterilizimit të qenëve, që Gjici ia miraton brenda pak minutash.
Aktualisht ish-kryebashkiaku i Kukësit Safet Gjici është nën hetim nga SPAK, nën akuzën për shpërdorim detyre.
