Ish-deputeti i PD-së, Igli Cara ka reaguar në lidhje me video-skandalin e publikuar dy ditë më parë, ku shfaqej kryebashkiaku i Kukës, tashmë i dorëhequr, Safet Gjici duke kryer marrëdhënie seksuale me një vajzë, në zyrën e tij.
Në një postim në rrjetet sociale, Cara shkruan se video e Gjicit godit në shenjë, pasi bëri që të harroheshin shumë skandale të tjera si: rrëzimi i padisë së opozitës për projektin e ri të portit të Durrësit, legalizimin e kanabisit, tensionet në veri të Kosovës apo edhe analizën që nuk u bë për rënien e euros gjatë zgjedhjeve lokale.
Reagimi i plotë
Çudia më e madhe tri ditë zgjat!
Video e ish kryebashkiakut goditi në shenjë.
Vendimi i Gjykatës Kushtetuese që i hapi rrugë zbatimit të “projektit” të portit të Durrësit nuk pati as kohën dhe as vëmendjen e duhur për t’u diskutuar. Rreth 3 miliardë euro nga fondet publike, të destinuara për këtë projekt, në emër të zhvillimit, që nuk ka asnjë lidhje as me Durrësin, as me turizmin, por me interesa të ngushta për të përfituar Rama & Co.
Pa harruar vatrën e nxehtë, Kosovën, që do të duhej të ishte kryefjala e çdo dite.
Dritë jeshile ju dha, sa hap e mbyll sytë, edhe legalizimit të kanabisit, që do të shoqërohet me ngritje Agjencish e Komisionesh.
As rënia e euros, që nisi çuditësisht pak ditë përpara zgjedhjeve vendore nuk u analizua. Përkundrazi po hyn në ciklin e “normalitetit” të diktuar nga partia shtet.
Gjici “mundi” Portin, kanabisin, Kosovën, rënien e euros dhe çdo çështje jetike në këtë vend!
