Pavarësisht se zgjedhjet lokale të 14 Majit duken sikur sapo janë mbajtur, sërish do të kemi zgjedhje të reja në dy bashki të vendit.
Bëhet fjalë për Rrogozhinën, ku Kolegji Zgjedhor zgjedhor vendosi ripërsëritjen e zgjedhjeve, pas konstatimeve të parregullsive me kutinë e burgut, e cila i dha fitoren kandidatit socialist Edison Memolla. Po ashtu, zgjedhje të reja do të kemi edhe në Bashkinë e Kukësit, pas dorëheqjes së kryebashkiakut Safet Gjicit, pas publikimit të video-skandalit ku shfaqej duke kryer marrëdhënie seksuale me një vajzë në zyrën e tij.
Por, duke qenë se situatat janë të ndryshme, sipas ligjit, vendimi për datën e zgjedhjeve në rastin e Kukësit i takon Presidentit të Republikës, Bajram Begaj ndërsa për Rrogozhinën do të vendosë Komisioni Qendror i Zgjedhjeve.
Kreu i shtetit do të vendosë dekretimin e datës së zgjedhjeve vetëm pasi të marrë njoftimin zyrtar nga Qeveria për shkarkimin e Gjicit si kryetar i Bashkisë së Kukësit.
Pritet që mes institucionit të Presidentit të Republikës dhe Komisionit Qendror të Zgjedhjeve të ketë një koordinim me qëllim që zgjedhjet në Rrogozhinë dhe Kukës të zhvillohet në të njëjtën ditë. Pas shpalljes së datës së zgjedhjeve, KQZ do duhet të shpallë afatet e regjistrimit në garën elektorale të subjekteve politike, kandidatëve, si dhe të të gjitha etapave në funksion të zhvillimit të këtyre zgjedhjeve.
