Në një kohë kur sezoni veror pritet të numërojë qindra turistë për të vizituar plazhet e Shqipërisë, vendi ynë ende vuan nga ndotja mjedisore.
Një rast i tillë është raportuar në Durrës mëngjesin e kësaj të mërkure, ku mbetje të shumta me bazë hidrokarbure kanë lëvizur nëpërmjet kanalizimeve të ujërave të ndotura të qytetit dhe kanë përfunduar tek impianti i trajtimit, në Shënavlash.
Mësohet se kjo ndotje është e përmasave shumë të mëdha dhe ka shkaktuar dëmtime tek disa pajisje të impiantit, dhe në kushte të tilla puna në impiant është ndërprerë deri në pastrimin e plotë të këtyre mbetjeve.
Raportohet se sasia e mbetjeve të tilla është hedhur në kanalizimet e zonës së Plazhit pranë stacionit të pompimit nr 6 dhe më pas ka shkuar në stacionin fundor nr 9 dhe që andej në impiantin e Shënavlashit.
Shoqëria Rajonale Ujësjellës Kanalizime Durrës (SHRUKD), njofton se ky është rasti i parë që ndotja është në përmasa kaq të mëdha, ndërsa kërkon nga instancat përkatëse gjetjen e autorëve që kanë shkaktuar këtë ngjarje me pasoja të mëdha për Impiantin dhe ekosistemin e zonës.
